فیض آباد 4؍ اکتوبر:(نامہ نگار ) حقیقی زندگی کے بجرنگی بھائی جان سید عابد حسین نے میڈیا کو ایک بیان جاری کرتے ہوئے بتایاکہ میں آپ کی توجہ ایک انتہائی سنجیدہ معاملے کی طرف مبذول کروانا چاہتا ہوں۔ سورج وشوکرما — گھنشیام وشوکرما کا بیٹا اور اتر پردیش کے مہاراج گنج ضلع کے نوتنوا تحصیل اور پورندر پور تھانہ علاقے کے گاؤں دھوسوا کالا کا رہائشی — مہاراج گنج کے ایک ایجنٹ کے ذریعے 27؍جولائی 2018کو سعودی عرب گیا تھا۔ اسے القاسم اور مدینہ شریف کے درمیان صحرائی علاقے کے ایک گاؤں میں کھیتی باڑی کا کام کرنا تھا۔ اسے800؍ریال ماہانہ تنخواہ دینے کا وعدہ کیا گیا تھا۔ شروع میں، اس نے تقریباً ایک سال تک ایک اسپانسر کے لیے کام کیا، لیکن جب وہ اسپانسر اسے ادائیگی کرنے میں ناکام رہا تو اس نے دوسرے سے رابطہ کیا۔ اس نئے اسپانسر نے1200؍ ریال کی تنخواہ کے ساتھ کھانے، رہائش اور موبائل کے اخراجات کے الاؤنس کا وعدہ کیا۔ انہوں نے سورج کو یہ بھی یقین دلایا کہ وہ اسپانسر شپ ٹرانسفر (کفالہ) کا عمل مکمل کریں گے اور ایک سال بعد اسے گھر واپس بھیج دیں گے۔ سید عابدحسین کے مطابق :’سورج کا خیال تھا کہ اس اسپانسر کے ساتھ اس کا مستقبل بہتر ہوگا، لیکن اسے اس کے لیے سات سال کام کرنا پڑا۔ اسپانسر شپ کی منتقلی کا عمل کبھی مکمل نہیں ہوا، اور اسے کوئی اجرت نہیں ملی۔ چند ابتدائی ادائیگیوں کے علاوہ، اسے اگلے سالوں میں کبھی ایک ریال یا روپیہ نہیں ملا۔ سورج سے مفت میں کام کروایا گیا اور غلام جیسا سلوک کیا گیا۔ کفیل نے سورج کو کئی بار مارا۔‘ سید عابد حسین بتاتے ہیں کہ سورج کی شادی 28 ؍اپریل 2018 کو ہوئی۔ وہ بہتر ازدواجی زندگی کی امید اور اپنے خاندان کے مالی حالات کو بہتر بنانے کے لیے سعودی عرب گیا، لیکن اسے ایسی شدید مشکلات کا سامنا کرنا پڑا کہ وہ واپس نہ آسکا۔سید عابد حسین کے پاس یہ کیس جولائی میں آیا تھا۔ ریاض میں ہندوستانی سفارت خانے اور وزارت خارجہ کی مدد سے انھوں نےاس سے پہلے پردیپ نامی ایک اور تارکین وطن کارکن کو اسی کفیل کے چنگل سے کامیابی سے بچایاتھا۔ سید عابدحسین نے ایک بار پھر ریاض میں ہندوستانی سفارت خانے اور وزارت خارجہ سے سورج کو بچانے کا راستہ تلاش کرنے کی اپیل کی تھی ۔ انھوں نے کہاکہ ریاض میں ہندوستانی سفارت خانہ اور وزارت خارجہ نے میرے پیغام پر توجہ دی ہے۔ اس کوشش میں ہر ممکن مدد فراہم کرنے کے لیے، سفارت خانے کے اہلکاروں نے سورج کے اسپانسر سے بات کی اور اسے یقین دلانے کے لیے اس سے فون پر براہ راست بات کی اور اسے اپنے مکمل تعاون کا وعدہ کیا۔
