ہندوستان کی پہلی تیر اندازی پریمیئر لیگ کے سیزن 1 کے شیڈول کا اعلان
نئی دہلی، 28 ستمبر (یو این آئی ) تیر اندازی پریمیئر لیگ (اے پی ایل) نے اپنے تاریخی پہلے سیزن کے شیڈول کا باضابطہ طور پر اعلان کیا ہے۔ نئی دہلی میں 2 سے 12 اکتوبر 2025 تک منعقد ہونے والا یہ ٹورنامنٹ نہ صرف اس کھیل کی تاریخی روایت کا احترام کرے گا بلکہ ہندوستانی اور عالمی تیر اندازی کے لیے ایک نیا باب بھی کھولے گا۔ اس میں ہندوستان اور دنیا کے نامور کھلاڑی شامل ہوں گے، جو کمپاؤنڈ اور ریکرو دونوں فارمیٹس کے منفرد امتزاج کی نمائش کریں گے۔ اے پی ایل میں چھ ٹیمیں دو راؤنڈ رابن مراحل میں حصہ لیں گی۔ پہلا مرحلہ 2 سے 6 اکتوبر تک جبکہ دوسرا مرحلہ 7 سے 11 اکتوبر تک چلے گا۔ اس کے بعد سیمی فائنل اور فائنل 12 اکتوبر کو کھیلے جائیں گے تاکہ افتتاحی اے پی ایل چیمپئن کا تعین کیا جا سکے۔ اس سیزن میں پرتھوی راج یودھا (دہلی)، مائٹی مراٹھا (مہاراشٹر)، کاکتیہ نائٹس (تلنگانہ)، راجپوتانہ رائلز (راجستھان)، چیرو آرچرز (جھارکھنڈ) اور چولا چیفس (تمل ناڈو) شامل ہوں گے۔ تمام میچ شام کو نئی دہلی کے یمنا اسپورٹس کمپلیکس میں کھیلے جائیں گے۔
اس ٹورنامنٹ میں ہندوستان کی سرفہرست تیر انداز دیپیکا کماری اور جیوتھی سریکھا وینم کے ساتھ ساتھ عالمی نمبر 1 مائیک شلوسر اور اینڈریا بیسیرا جیسے بین الاقوامی ستارے اور اولمپئنز بریڈی ایلیسن اور الیجینڈرا والینسیا شامل ہوں گی۔ اے پی ایل کے ڈائریکٹر انیل کمیینی نے لیگ کے آغاز کے موقع پر کہا، یہ صرف ایک لیگ نہیں ہے، یہ ہندوستان کی روایات کا جشن ہے اور اولمپک گولڈ کا خواب ہے۔اپنی ٹیم کے جھڑپوں، ثقافتی پرفارمنس اور تفریحی فارمیٹ کے ساتھ، تیر اندازی پریمیئر لیگ ہندوستانی کھیلوں میں ایک نئے دور کا آغاز کرنے والی ہے۔
