جے پور، 13 اپریل (یو این آئی) فل سالٹ (65) اور وراٹ کوہلی (ناٹ آؤٹ 62) کی شاندار نصف سنچریوں کی بدولت رائل چیلنجرز بنگلور (آر سی بی) نے انڈین پریمیئر لیگ (آئی پی ایل) کے اتوار کو 28ویں میچ میں راجستھان رائلز (آر آر) کو 15 گیندیں باقی رہتے نو وکٹوں سے شکست دے دی۔174 رنز کے ہدف کے تعاقب میں آر سی بی کے اوپنرز فل سالٹ اور وراٹ کوہلی نے شاندار آغاز کیا، پہلی وکٹ کے لیے 92 رنز بنائے۔ نویں اوور میں کمار کارتیکیا نے فل سالٹ کو آؤٹ کرکے آر آر کو پہلی کامیابی دلائی۔ بعد میں دیو دت پڈیکل بیٹنگ کے لیے آئے اور وراٹ کوہلی کے ساتھ دوسری وکٹ کے لیے 83 رنز کی ناٹ آؤٹ شراکت داری کرتے ہوئے رائل چیلنجرز بنگلور کو 17.3 اوور میں نو وکٹوں سے جیت دلانے میں مدد کی۔ وراٹ کوہلی نے 45 گیندوں میں 4 چوکے اور 2 چھکے (ناٹ آؤٹ 62) جبکہ دیودت پڈک نے 28 گیندوں میں 5 چوکے اور 1 چھکا (40 ناٹ آؤٹ) اسکور کیا۔آر آر کی جانب سے کمار کارتیکیا نے ایک وکٹ حاصل کی۔
اس سے پہلے آج آر سی بی کے کپتان رجت پاٹیدار نے ٹاس جیت کر پہلے گیند بازی کرنے کا فیصلہ کیا۔ بلے بازی کے لیے آتے ہوئے یشسوی جیسوال اور کپتان سنجو سیمسن کی اوپننگ جوڑی نے راجستھان رائلز کے لیے پہلی وکٹ کے لیے 49 رنز جوڑے۔ ساتویں اوور میں کرونل پانڈیا نے سنجو سیمسن (15) کو بڑا شاٹ کھیلنے کی کوشش میں وکٹ کیپر جیتیش شرما کے ہاتھوں اسٹمپ کرایا۔ اس کے بعد ریان پراگ بیٹنگ کے لیے آئے اور یشسوی جیسوال کے ساتھ مل کر اننگز کو سنبھالا۔ دونوں بلے بازوں کے درمیان دوسری وکٹ کے لیے 56 رنز کی شراکت ہوئی۔ وراٹ کوہلی نے 14ویں اوور میں ریان پراگ کو یش دیال کی گیند پر کیچ کرا کر اس شراکت داری کا خاتمہ کیا۔ ریان پراگ نے 22 گیندوں میں تین چوکوں اور ایک چھکے کی مدد سے (30) رنز بنائے۔ سنچری کی طرف بڑھ رہے یشسوی کو جوش ہیزل ووڈ نے ایل بی ڈبلیو کر کے پویلین بھیج دیا۔ یشسوی جیسوال نے 47 گیندوں میں 10 چوکوں اور 2 چھکوں کی مدد سے (75) رنز بنائے۔ بھونیشور نے 20ویں اوور کی پانچویں گیند پر شمرون ہیٹمائر (نو) کو آؤٹ کیا۔ راجستھان رائلز نے مقررہ 20 اوورز میں چار وکٹ پر 173 رنز بنائے۔ دھرو جورل نے 23 گیندوں میں دو چوکوں اور دو چھکوں کی مدد سے 35 رنز بنائے۔رائل چیلنجرز بنگلور کی جانب سے کرونل پانڈیا، جوش ہیزل ووڈ، بھونیشور کمار اور یش دیال نے ایک ایک بلے باز کو آؤٹ کیا۔
