بھوپال 19 اگست:وزیراعلیٰ ڈاکٹر موہن یادو نے کہا ہے کہ بہنیں اور بیٹیاں ہمارے گھر آنگن کی رونق ہیں۔ بہنوں اور بیٹیوں کا مان سمان اور ان کا معاشی بااختیار بنانا ہماری اولین ترجیح ہے۔ انہوں نے کہا کہ رکشا بندھن تو سال میں ایک بار آتا ہے، لیکن ہماری حکومت ہر ماہ بہنوں سے ان کی حفاظت کا وعدہ پورا کر رہی ہے۔ وزیراعلیٰ نے کہا کہ وزیراعظم مسٹر نریندر مودی کی قیادت میں ہماری لاڈلی بہنوں کو ہر ماہ تحفہ مل رہا ہے۔ ہماری ہندوستانی ثقافت میں سخاوت اور رشتوں کا احترام کرنے کی روایت ہے۔ ہم ’وسودھیو کٹمبکم‘ کے جذبے سے پوری دنیا کو اپنا خاندان مانتے ہیں۔ ہم نے آج ہی میہر سے ریاست کی تمام لاڈلی بہنوں کو مائیکہ کا تحفہ (ریاستی حکومت کا تحفہ) دیا ہے۔وزیراعلیٰ ڈاکٹر یادو بدھ کے روز میہر میں منعقد ریاستی سطح کی لاڈلی بہنا کانفرنس سے خطاب کر رہے تھے۔ وزیراعلیٰ ڈاکٹر یادو نے میہر ضلع کی باصلاحیت ہاکی کھلاڑی محترمہ اننیا اودھیہ اور محترمہ اْنّتی پانڈے کے ساتھ ریاست کی 1 کروڑ 25 لاکھ 13 ہزار سے زیادہ لاڈلی بہنوں کے کھاتوں میں وزیراعلیٰ لاڈلی بہنا یوجنا کی 39ویں قسط اور رکشا بندھن کے خصوصی شگون کے 250 روپے (کل 1750 روپے) کے طور پر 2 ہزار 148 کروڑ روپے ایک ہی کلک سے بینک کھاتوں میں منتقل کیے۔ قابلِ ذکر ہے کہ جون 2023 میں وزیراعلیٰ لاڈلی بہنا یوجنا کے آغاز سے اگست 2026 تک 39 قسطوں میں لاڈلی بہنوں کے کھاتوں میں 63 ہزار 248 کروڑ روپے کی امدادی رقم منتقل کی جا چکی ہے۔ موجودہ مالی سال 2026-27 میں یوجنا کے لیے 23,882.81 کروڑ روپے کا بجٹ رکھا گیا ہے۔
وزیراعلیٰ ڈاکٹر یادو نے کہا کہ وزیراعظم مسٹر مودی کی مدتِ کار میں ہندوستانی فوج بہنوں کے مان سمان کی حفاظت کے لیے مضبوط بنی ہے۔ رکشا بندھن کا دھاگا بھائی بہن کی محبت کی علامت ہے۔ ریاستی حکومت بہنوں کے احترام پر کبھی سمجھوتہ نہیں کرتی ہے۔ لاڈلی بہنا یوجنا کے تحت ہر ماہ بہنوں کے کھاتوں میں رقم بھیجی جا رہی ہے۔ ریاست کی 1 کروڑ 25 لاکھ لاڈلی بہنوں کا آشیرواد حکومت کو مل رہا ہے۔
ہر سال رکشا بندھن سے پہلے بہنوں کو 250 روپے کا شگون بھی بھیجا جا رہا ہے۔
اس موقع پر وزیراعلیٰ ڈاکٹر یادو نے میہر ضلع میں تقریباً 256 کروڑ روپے سے زیادہ کی لاگت کے 25 ترقیاتی کاموں کا افتتاح اور سنگِ بنیاد بھی رکھا۔ وزیراعلیٰ ڈاکٹر یادو نے میہر کے استاد علاؤالدین خاں اسٹیڈیم میں منعقد ریاستی سطح کی لاڈلی بہنا کانفرنس کا دیپ روشن کرکے افتتاح کیا۔ وزیراعلیٰ ڈاکٹر یادو نے ضلع کی ترقیاتی سرگرمیوں اور پروگراموں نیز اسکیموں کی حصولیابیوں پر لگائی گئی نمائش کا مشاہدہ بھی کیا۔
