نئی دہلی، 2 اگست (یو این آئی) رجت پاٹیدار سیزن کے آغاز پر کھیلی جانے والی دلیپ ٹرافی میں دفاعی چیمپئن سنٹرل زون کی قیادت کریں گے جبکہ بائیں ہاتھ کے جارحانہ بلے باز رنکو سنگھ کو نائب کپتان مقرر کیا گیا ہے۔۔ ٹیم میں بائیں ہاتھ کے اسپن آل راؤنڈر ہرش دوبے اور تیز گیندباز یش ٹھاکر بھی شامل ہیں۔مدھیہ پردیش کے سارنش جین، جو اس وقت سری لنکا کے دورے کے لیے ہندوستان کی ٹیسٹ ٹیم کا حصہ ہیں، ہرش دوبے اور اتر پردیش کے لیگ اسپنر ذیشان انصاری کے ساتھ اسپن شعبے کی ذمہ داری سنبھالیں گے۔ ذیشان نے حالیہ ہندوستان اے کے سری لنکا دورے کے دوران پانچ برس بعد فرسٹ کلاس کرکٹ میں واپسی کی تھی۔
ودربھ کے اوپنر امن موکھاڈے کو 2025-26 رنجی سیزن میں شاندار کارکردگی کا انعام ملا ہے۔ انہوں نے 11 اننگز میں 760 رنز 76 کی اوسط سے بنائے تھے، جس کے بعد انہیں ہندوستان اے ٹیم میں بھی جگہ ملی۔ ان کے علاوہ چھتیس گڑھ کے اوپنر آیوش پانڈے کو بھی ٹیم میں شامل کیا گیا ہے، جنہوں نے سری لنکا میں ہندوستان اے کی نمائندگی کی تھی۔
ودربھ کے یش راٹھوڑ بھی مڈل آرڈر میں رجت پاٹیدار کے ساتھ اہم کردار ادا کریں گے۔تیز گیندبازی میں یش ٹھاکر کے ساتھ ودربھ کے ناچیکیت بھوٹے اور مدھیہ پردیش کے بائیں ہاتھ کے سوئنگ گیندباز ارشد خان شامل ہیں، جبکہ اتر پردیش کے آریان جویال پہلی پسند کے وکٹ کیپر ہوں گے اور کنال سنگھ راٹھور متبادل وکٹ کیپر کے طور پر ٹیم کا حصہ ہوں گے۔دفاعی چیمپئن ہونے کے باعث سنٹرل زون کو پہلے مرحلے میں بائی ملی ہے اور وہ 30 اگست سے سیمی فائنل میں براہ راست ایسٹ زون اور شمال مشرقی زون کے درمیان ہونے والے مقابلے کی فاتح ٹیم سے مقابلہ کرے گا۔ دلیپ ٹرافی کا آغاز 23 اگست کو بنگلورو میں ہوگا، جبکہ فائنل 6 ستمبر سے کھیلا جائے گا۔
سنٹرل زون اسکواڈ: رجت پاٹیدار (کپتان)، رنکو سنگھ (نائب کپتان)، آریان جویال (وکٹ کیپر)، کنال سنگھ راٹھور (وکٹ کیپر)، سارنش جین، امن موکھاڈے، کنال چندیلا، ذیشان انصاری، آریان پانڈے، ارشد خان، آیوش پانڈے، یش راٹھوڑ، ہرش دوبے، یش ٹھاکر اور ناچیکیت بھوٹے۔
