بھوپال:09؍مئی:وزیرتوانائی مسٹر پردیومن سنگھ تومر نے محکماتی اسکیموں کا جائزہ لینے کے دوران افسروں کو ہدایت دی کہ وہ زیر التواء بجلی بلوں کی وصولی کے لیے ایک منصوبہ بند ایکشن پلان بنائیں۔ انہوں نے کہا کہ بجلی کے بلوں کی وصولی کا سہ ماہی جائزہ لیا جائے گا۔وزیر توانائی نے کہا کہ پی ایم سوریہ گھر اسکیم کی وسیع پیمانے پر تشہیر کی جائے اور اس پر عمل درآمد کو بھی یقینی بنایا جائے۔ لائن لاسز کو کم کرنے کے لیے اہداف مقرر کریں۔ اس کے علاوہ تمام پہلوؤں کا مطالعہ کریں اور غیر قانونی بستیوں میں بجلی کے مستقل کنکشن دینے کے حوالے سے لائحہ عمل بنائیں۔وزیر مسٹر تومر نے ڈسٹری بیوشن ٹرانسفارمروں میں میٹرنگ مقررہ وقت کے اندر کرنے کی ہدایات جاری کیں۔ انہوں نے ای-کے وائی سی، صنعت دوست یوجنا اور دیگر اسکیموں کا جائزہ لیا اور ضروری ہدایات دیں۔
واقعات- حادثات پر گہری نظر رکھیں
وزیر توانائی نے کہا کہ پڑوسی ملک کے ساتھ جاری کشیدگی کے پیش نظر کسی بھی واقعے یا حادثے پر کڑی نظر رکھیں۔ بجلی کی فراہمی کو ہر حال میں یقینی بنایا جائے۔ بجلی میں کوئی خلل نہیں ہونا چاہئے۔ ضلعی انتظامیہ کے ساتھ مسلسل رابطے میں رہیں، کسی بھی سطح پر کوئی غلط بات نہیں ہونی چاہیے۔ایڈیشنل چیف سکریٹری توانائی مسٹر نیرج منڈلوئی نے محکمہ جاتی اسکیموں کی پیش رفت کے بارے میں جانکاری دی۔ اس موقع پر ایم ڈی پاور مینجمنٹ کمپنی مسٹر اویناش لوانیا، ایم ڈی سنٹرل ریجن الیکٹرسٹی ڈسٹری بیوشن کمپنی مسٹر شتیج سنگھل، ایم ڈی ایسٹ زون الیکٹرسٹی ڈسٹری بیوشن کمپنی مسٹر انائے دویدی، ایم ڈی ویسٹ زون الیکٹرسٹی ڈسٹری بیوشن کمپنی مسٹر انوپ سنگھ، ایم ڈی ٹرانسکو مسٹر سنیل تیواری اور ایم ڈی جنریشن کمپنی مسٹر منجیت سنگھ میٹنگ میں ویڈیو کانفرنسنگ کے ذریعے جڑے رہے۔
