ممبئی، 6 اپریل (یواین آئی) پانچ بار کی چیمپئن ممبئی انڈینز انڈین پریمیئر لیگ (آئی پی ایل) کے 20ویں میچ میں اپنے غیر متوازن مہم کو بحال کرنے کے لیے پیر کے روز رائل چیلنجرز بنگلورو (آر سی بی) کے خلاف گھریلو میدان کے فائدے کا استعمال کرنے کی کوشش کرے گی۔ ممبئی نے رواں سیزن میں اب تک کھیلے گئے چار میچوں میں صرف ایک جیت حاصل کی ہے۔ ایم آئی کی ناقص کارکردگی کی وجہ سے ٹیم کے توازن اور قیادت پر سوالات اٹھنے لگے ہیں۔ ہاردک پانڈیا کی بطور کپتان سیزن کے خراب آغاز کے ساتھ شروع ہوئی، تاہم لکھنؤ سپر جائنٹس کے خلاف گزشتہ میچ میں پانڈیا نے پانچ وکٹیں لے کر فارم کی جھلک دکھائی ہے۔ممبئی کی ناکامی کی بڑی وجہ ٹیم میں ہم آہنگی کی کمی نظر آ رہی ہے۔ بیٹنگ آرڈرتسلسل کے ساتھ اچھا کھیلنے میں ناکام رہا ہے۔ روہت شرما، جو گزشتہ میچ میں چوٹ کی وجہ سے نہیں کھیلے تھے، ابھی تک اپنی فارم میں نہیں ہیں۔ ٹیم میں سوریا کمار یادو واحد بلے باز ہیں، جنہوں نے 57 کی اوسط اور 161.32 کے اسٹرائیک ریٹ سے 171 رنز بنائے ہیں اور وہ بکھرتی بیٹنگ لائن کے باوجود جمے ہوئے نظر آ رہے ہیں۔وانکھیڑے اسٹیڈیم کی پچ بڑےاسکور والے میچوں کے لیے مشہور ہے، جو میزبان ٹیم کو کچھ راحت فراہم کر سکتی ہے۔ ممبئی نے اس میدان پر آر سی بی کے خلاف 11 میں سے 8 میچ جیتے ہیں، لیکن اس بار انہیں اِن فارم بنگلورو کو ہرانے کے لیے سخت محنت کرنی ہوگی۔ آر سی بی دو جیت اور ایک شکست کے ساتھ میدان میں اتر رہی ہے۔ بنگلورو نے گجرات ٹائٹنز کے خلاف ایک بڑے اسکور والے میچ میں شکست کا سامنا کیا تھا۔
وراٹ کوہلی کا وانکھیڑے اسٹیڈیم میں 18 میچوں میں 44.15 کی اوسط سے 574 رنز کا شاندار ریکارڈ ہے، اور وہ ایک بار پھر اپنی ٹیم کے اہم کھلاڑی ہوں گے۔ انگلش آل راؤنڈر لیام لیونگسٹون نے گجرات کے خلاف 54 رنز بنا کر اپنی فارم بحال کی اور ٹم ڈیوڈ اور جیتیش شرما کے ساتھ مل کر ایک خطرناک مڈل آرڈر تیار کیا ہے۔گزشتہ سیزن میں اکثر تنقید کا شکار رہنے والی آر سی بی کی بولنگ اس سال کہیں زیادہ مضبوط نظر آ رہی ہے۔ آسٹریلوی فاسٹ بولر جوش ہیزل ووڈ نے تین میچوں میں 7.26 کی اکانومی ریٹ سے 6 وکٹیں حاصل کی ہیں، جبکہ بھونیشور کمار نئی گیند کے ساتھ قابلِ اعتماد رہے ہیں۔ کرونال پانڈیا اور لیام لیونگسٹون کی قیادت میں اسپن کا شعبہ بھی بہتر کارکردگی فراہم کر رہا ہے۔وانکھیڑے اسٹیڈیم کی پچ بیٹنگ کے لیے سازگار ہونے کی توقع ہے۔ اس میدان پر ٹاس جیتنے والی ٹیم عام طور پر پہلے گیند بازی کو ترجیح دیتی ہے، کیونکہ 119 ٹی20 میچوں میں سے 65 میچ وہ ٹیمیں جیت چکی ہیں جنہوں نے ہدف کا تعاقب کیا ہے۔ممبئی انڈینز اپنی مہم کو دوبارہ بحال کرنے کی کوشش کر رہی ہے، جبکہ آر سی بی اپنی جیت کے تسلسل کو برقرار رکھنے کے لیے میدان میں اترے گی۔ پیر کا میچ انتہائی سنسنی خیز ہونے والا ہے۔
