جوہانسبرگ، 22 نومبر (یو این آئی) وزیر اعظم نریندر مودی نے ہفتہ کو یہاں جی 20 سربراہ اجلاس کے موقع پر مختلف ممالک کے رہنماؤں سے ملاقات کی اور دو طرفہ اور عالمی اہمیت کے امور پر تبادلہ خیال کیا۔ ان ملاقاتوں کے دوران ہندوستان، آسٹریلیا اور کینیڈا نے ٹیکنالوجی اور اختراعی شراکت داری پر بھی دستخط کئے۔ مسٹر مودی 20 ممالک کے لیڈروں کی 20 ویں چوٹی کانفرنس میں شرکت کے لیے تین روزہ دورے پر جمعہ کو یہاں پہنچے۔ انہوں نے سربراہ اجلاس کے موقع پر ان رہنماؤں سے ملاقاتیں کیں۔ انہوں نے آسٹریلوی وزیر اعظم انتھونی البانیز، کینیڈا کے وزیر اعظم مارک کارنی، برطانوی وزیر اعظم کیئر سٹارمر، اقوام متحدہ کے سیکرٹری جنرل انتونیو گوٹیرس، برازیل کے صدر لوئیز اناسیو لولا ڈا سلوا اور جنوبی کوریا کے صدر لی جے میونگ سے ملاقاتیں کیں۔ انہوں نے سوشل میڈیا پوسٹس کی ایک سیریز میں اس بارے میں آگاہ کیا۔
آسٹریلیا کے وزیر اعظم انتھونی البانی اور کینیڈا کے وزیر اعظم مارک کارنی سے ایک ساتھ ملاقات کرتے ہوئے انہوں نے اس ملاقات کو “تین طرفہ ٹیکنالوجی اور اختراعی شراکت داری” قرار دیا۔ انہوں نے کہا کہ تینوں ممالک آئندہ نسلوں کے بہتر مستقبل کی تعمیر کے لیے مل کر کام کرنے کے خواہشمند ہیں۔ ایک سوشل میڈیا پوسٹ میں، انہوں نے کہا، ” ایک نئی سہ رخی ٹیکنالوجی اور اختراعی شراکت داری! جوہانسبرگ میں جی20 سربراہ اجلاس کے موقع پر آسٹریلیا کے وزیر اعظم انتھونی البانی اور کینیڈا کے وزیر اعظم مارک کارنی کے ساتھ ایک شاندار ملاقات ہوئی۔ ہمیں آج یہ اعلان کرتے ہوئے خوشی ہو رہی ہے کہ آسٹریلیا-کینیڈا-انڈیا ٹیکنالوجی اینڈ انوویشن (اے سی آئی ٹی آئی) اس ٹکنالوجی کی پہل میں شراکت داری کو مزید مضبوط کرے گا۔ تین براعظموں اور تین سمندروں میں جمہوری شراکت داروں کے درمیان، سپلائی چین کے تنوع، صاف توانائی، اور اے آئی کو وسیع پیمانے پر اپنانے کے لیے ہم آنے والی نسلوں کے لیے بہتر مستقبل کی ضمانت دینے کے لیے مل کر کام کرنے کے منتظر ہیں۔
