بھوبال، 30 دسمبر (یواین آئی) نئی دہلی میں واقع ڈاکٹر کرنی سنگھ شوٹنگ رینج میں منعقدہ 68ویں قومی شوٹنگ چیمپئن شپ (شاٹ گن ایونٹس) میں مدھیہ پردیش کی خاتون نشانہ بازوں نے شاندار کارکردگی کا مظاہرہ کرتے ہوئے ریاست کا نام روشن کیا۔ یہ مقابلہ یکم دسمبر 2025 سے 5 جنوری 2026 تک کھیلا جائے گا جس میں ملک بھر کے سرِفہرست شوٹروں نے شرکت کی ہے۔
ٹریپ وومن انفرادی فائنل میں مدھیہ پردیش کی نیرو نے طلائی تمغہ جیت کر ریاست کا سر فخر سے بلند کیا۔ اسی مقابلے میں پرگتی دوبے نے کانسی کا تمغہ حاصل کر کے ریاست کو دوسرا اعزاز دلایا۔
ٹیم ٹریپ وومن مقابلے میں پرگتی دوبے، نیرو اور منیشا کیر کی ٹیم نے بہترین تال میل اور شاندار نشانہ بازی کا مظاہرہ کرتے ہوئے طلائی تمغہ اپنے نام کیا اور ریاست کو قومی سطح پر سرفہرست مقام دلایا۔
جونیئر ٹریپ فائنل میں مانویتا سنگھ راوت نے چوتھا مقام حاصل کر کے شاندار کارکردگی کا مظاہرہ کیا۔ یہ کامیابی ان کے روشن مستقبل اور مسلسل ترقی کی علامت ہے۔
اس طرح مدھیہ پردیش نے شاٹ گن (ٹریپ) مقابلوں میں مجموعی طور پر 3 تمغے (2 طلائی اور 1 کانسی) حاصل کر کے قومی سطح پر اپنی مضبوط موجودگی درج کرائی۔
