بھوپال 12 اگست:گجرات کے احمد آباد میں منعقدہ سرمایہ کاری مکالمے کے دوران مدھیہ پردیش کو مختلف شعبوں میں 8 ہزار 635 کروڑ روپے کی سرمایہ کاری کی تجاویز موصول ہوئی ہیں۔ ان تجاویز سے 5 ہزار 785 سے زیادہ روزگار کے مواقع پیدا ہوں گے۔ سرمایہ کاری مکالمے میں گجرات کے احمد آباد، سورت، بھاؤ نگر، راج کوٹ اور وڈودرا سمیت اہم صنعتی مراکز سے 500 سے زیادہ صنعت کاروں، سرمایہ کاروں اور کارپوریٹ نمائندوں نے شرکت کی اور مدھیہ پردیش میں سرمایہ کاری کے تئیں خصوصی دلچسپی ظاہر کی۔ وزیراعلیٰ ڈاکٹر موہن یادو نے بدھ کے روز احمد آباد میں منعقدہ میگا سرمایہ کاری مکالمے (مدھیہ پردیش میں سرمایہ کاری کے مواقع پر انٹرایکٹو سیشن) میں ملک بھر سے آئے اہم صنعت کاروں اور سرمایہ کاروں سے خطاب کیا۔
وزیراعلیٰ ڈاکٹر یادو نے کہا کہ مدھیہ پردیش تجارت و کاروبار، نئی صنعتی اکائیوں کے قیام و توسیع اور کاروباری توسیع کے لیے بے پناہ امکانات کی سرزمین ہے۔ مدھیہ پردیش میں سرمایہ کاری ہمیشہ سے ہی فائدے کا سودا رہی ہے۔ ملک بھر کے سرمایہ کاروں کا ریاست کی ساڑھے آٹھ کروڑ عوام کی جانب سے خیرمقدم کرتے ہوئے وزیراعلیٰ نے کہا کہ ریاست میں سرمایہ کاری کرنے والوں کو ہماری حکومت ہر ممکن سہولت، تحفظ اور تعاون فراہم کرے گی۔ وزیراعظم مسٹر نریندر مودی کی قیادت میں خود کفیل ہندوستان کی تعمیر کے لیے ملک میں جاری ترقی کے یَگیہ کا ذکر کرتے ہوئے وزیراعلیٰ نے کہا کہ مدھیہ پردیش کی نئی صنعتی پالیسیوں کو ملک کی صنعتی دنیا کی جانب سے پذیرائی مل رہی ہے۔
انہوں نے کہا کہ صنعت چلانے کے لیے بنیادی طور پر ٹھوس پالیسی، نیک نیتی اور تعاون کرنے والی حکومت ضروری ہے۔ مدھیہ پردیش میں آپ کو یہ تینوں چیزیں ملیں گی۔ وزیراعلیٰ نے گجرات کی صنعتی دنیا کو آئندہ مجوزہ گلوبل انویسٹرز سمٹ-2027، بھوپال میں شرکت کی دعوت دیتے ہوئے کہا، آپ کے پاس تجربہ ہے اور ہمارے پاس مواقع ہیں۔ اگر ہمارے مواقع کو آپ کا تجربہ مل جائے تو ہم مل کر تاریخ رقم کریں گے۔ وزیراعلیٰ ڈاکٹر یادو نے صنعت کاروں سے مدھیہ پردیش کی ترقی کے سفر میں ہم سفر بننے کی اپیل کرتے ہوئے کہا کہ آئیے، مدھیہ پردیش میں بلا کسی جھجھک اور کھلے دل سے سرمایہ کاری کیجیے اور ہمارے ساتھ ترقی کے اس تاریخی سفر کا حصہ بنیے۔
وزیراعلیٰ ڈاکٹر یادو نے کہا کہ مدھیہ پردیش میں سرمایہ کاروں کو بجلی، پانی اور زمین کی فکر کرنے کی ضرورت نہیں ہے۔ صنعتی زمین رعایتی نرخوں پر لیز پر دستیاب ہے، وافر واٹر بینک اور اضافی بجلی موجود ہے جبکہ پلگ اینڈ پلے زون تیار کیے جا رہے ہیں۔ تقریباً 19 ہزار ایکڑ رقبے میں 48 نئے صنعتی پارک تیار کیے جا رہے ہیں۔ سنگل ونڈو سسٹم کو ’مسائل کا خاتمہ، فوری خدمت‘ قرار دیتے ہوئے وزیراعلیٰ نے کہا کہ ہر رکاوٹ کا حل ایک ہی ڈیجیٹل پلیٹ فارم پر دستیاب ہے۔ آسان اور سہل رابطہ کاری کو ریاست کی بڑی طاقت قرار دیتے ہوئے وزیراعلیٰ نے کہا کہ مدھیہ پردیش میں 5 لاکھ کلومیٹر سے زیادہ سڑکوں کا نیٹ ورک، مضبوط ریلوے رابطہ، 8 ہوائی اڈے، 6 اندرونِ ملک کنٹینر ڈپو، ایکسپریس وے اور ہائی ویز دستیاب ہیں۔ انہوں نے کہا کہ ریاست میں تربیت یافتہ اور ہنرمند افرادی قوت بھی انتہائی آسانی سے دستیاب ہے۔
