بلاوایو (زمبابوے)17؍جنوری :بھارت نے انڈر 19 ورلڈ کپ میں لگاتار دوسری فتح حاصل کر لی ہے۔ ٹیم نے ہفتہ کے روز بارش سے متاثرہ میچ میں بنگلہ دیش کو 18 رنز سے شکست دی۔ بلاوایو میں بنگلہ دیش نے ٹاس جیت کر پہلے گیند بازی کا فیصلہ کیا۔بھارت نے پہلے کھیلتے ہوئے 48.4 اوور میں 238 رنز بنا کر آل آؤٹ ہو گیا۔ اس کے بعد بھارت نے بنگلہ دیش کو 49 اوور میں 239 رنز کا ہدف دیا، جسے بارش کے باعث نظرِ ثانی کر کے 29 اوور میں 165 رنز کر دیا گیا۔
قبل ازیں ویبھو سوریہ ونشی (72) اور ابھیگیان کنڈو (80) کی نصف سنچری اننگز کی بدولت ہندوستان نے ہفتہ کو انڈر-19 ورلڈ کپ کے بارش سے متاثرہ مقابلے میں بنگلہ دیش کے خلاف 238 رن اسکور کیے۔ بنگلہ دیش نے آج یہاں ٹاس جیت کر پہلے گیندبازی کا فیصلہ کیا۔ بلے بازی کے لیے اتری ہندوستانی انڈر-19 ٹیم کی شروعات اچھی نہ رہی اور 53 کے مجموعی اسکور تک اس کے تین وکٹ گر گئے۔ کپتان آیوش مہاترے (6) اور ویدانت تریویدی (صفر) کو تیسرے اوور میں ال فہد نے آؤٹ کیا، جبکہ وہان ملہوترا (7) کو 10ویں اوور میں عزیزالحکیم نے پویلین بھیج دیا۔اس کے بعد ابھیگیان کنڈو نے ویبھو سوریہ ونشی کے ساتھ اننگز کو سنبھالا اور تیزی سے رن بٹورے۔ دونوں بلے بازوں نے چوتھی وکٹ کے لیے 62 رن کی شراکت قائم کی، اسی دوران ویبھو سوریہ ونشی نے اپنی نصف سنچری مکمل کی۔ 27ویں اوور میں اقبال حسین نے ویبھو سوریہ ونشی کو آؤٹ کر کے ہندوستان کو چوتھا نقصان پہنچایا۔ ویبھو سوریہ ونشی نے 67 گیندوں میں چھ چوکے اور تین چھکے کی مدد سے 72 رن کی شاندار اننگز کھیلی۔ہروَنش پنگالیا (2) اور کنشک چوہان (28) رن بنا کر آؤٹ ہوئے۔ بارش کے باعث کھیل رکے جانے کے وقت ہندوستان نے 39 اوور میں چھ وکٹ پر 192 رن بنا لیے تھے۔ بارش کے بعد کھیل دوبارہ شروع ہوا تو 40ویں اوور میں شیخ پرویز نے امبریش (5) کو آؤٹ کیا۔ ہندوستان کی آٹھویں وکٹ کھلن پٹیل (8) کے طور پر 45ویں اوور میں گری۔
اس دوران ابھیگیان کنڈو ایک اینڈ سنبھالے ہوئے رن بناتے رہے، تاہم 47ویں اوور میں ال فہد نے انہیں آؤٹ کر دیا۔ ابھیگیان کنڈو نے 112 گیندوں میں چار چوکے اور تین چھکے کی مدد سے 80 رن کی اننگز کھیلی۔ 49ویں اوور کی چوتھی گیند پر ال فہد نے دیپیش دیویندرن (11 رن، 6 گیندیں) کو آؤٹ کر کے ہندوستانی اننگز کو 238 رن پر سمیٹ دیا۔
بنگلہ دیش کی جانب سے ال فہد نے پانچ وکٹیں حاصل کیں، جبکہ اقبال حسین اور عزیزالحکیم نے دو دو وکٹیں حاصل کیں۔ شیخ پرویز نے ایک بلے باز کو آؤٹ کیا۔
