دبئی، 5 اکتوبر (یو این آئی) بین الاقوامی کرکٹ کونسل (آئی سی سی) نے تیسرے ایک روزہ میچ میں سست اوور رفتار کے لیے ہندوستانی کھلاڑیوں پر میچ فیس کا 20 فیصد اور ویسٹ انڈیز کے کھلاڑیوں پر 10 فیصد جرمانہ عائد کیا ہے۔
ہفتے کو کھیلے گئے اس میچ میں ہندوستان مقررہ وقت سے 4 اوور پیچھے رہا، جبکہ ویسٹ انڈیز 2 اوور پیچھے رہا۔ اسی بنیاد پر دونوں ٹیموں پر جرمانہ عائد کیا گیا۔ آئی سی سی کے ضابطہ اخلاق کی شق 2.22 کے مطابق مقررہ وقت میں جتنے اوور کم کرائے جاتے ہیں، فی اوور میچ فیس کا 5 فیصد جرمانہ عائد کیا جاتا ہے۔
ویسٹ انڈیز نیو چنڈی گڑھ ایک روزہ میچ میں 0-2 سے پیچھے رہتے ہوئے اترا تھا۔ اسے ترواننت پورم میں کھیلے گئے پہلے ایک روزہ اور گوہاٹی میں ہوئے دوسرے ایک روزہ میچ میں 8-8 وکٹ سے شکست ملی تھی۔ دوسرے میچ میں ہندوستان نے ریکارڈ ہدف کا کامیابی سے تعاقب کرکے سیریز اپنے نام کرلی تھی۔ تیسرے میچ میں کپتان شائی ہوپ نے 143 گیندوں پر ناٹ آؤٹ 162 رنز کی شاندار اننگز کھیلی۔ ان کی قیادت میں ویسٹ انڈیز نے 351 رنز کے ہدف کو حاصل کرتے ہوئے ایک روزہ کرکٹ کی تاریخ میں اپنا سب سے بڑا کامیاب رن چیز مکمل کیا اور 5 وکٹ سے جیت درج کی۔
انفرادی کارکردگی کی بات کی جائے تو ہندوستان کے کپتان شبھمن گل اور ہوپ دونوں نے بلے سے یادگار سیریز کھیلی۔ گل نے 110، ناٹ آؤٹ 223 اور ایک رن کی اننگز کھیل کر سیریز میں سب سے زیادہ 334 رنز بنائے، جبکہ ہوپ نے 12، 104 اور ناٹ آؤٹ 162 رنز کی اننگز کی مدد سے 278 رنز بنا کر دوسرا مقام حاصل کیا۔
