روم، 6 اپریل (یو این آئی) دنیا کے نمبر ایک کھلاڑی جننک سنر نے کہا کہ وہ بے قصور ہیں اور ان پر ٹینس سے تین ماہ کی ڈوپنگ پابندی سراسر غیر منصفانہ ہے۔23 سالہ اطالوی کھلاڑی پر گزشتہ سال منشیات کا ٹیسٹ مثبت پائے جانے پر ورلڈ اینٹی ڈوپنگ ایجنسی (ڈبلیو اے ڈی اے) نے فروری میں پابندی عائد کر دی تھی۔ بی بی سی کی رپورٹ کے مطابق، ڈبلیو اے ڈی اے نے اعتراف کیا کہ سنر نے ممنوعہ مادے سے کوئی مسابقتی فائدہ حاصل نہیں کیا اور وہ حادثاتی کنٹیمی نیشن کا ذمہ دار نہیں ہے۔اس سال کے شروع میں آسٹریلین اوپن جیتنے والے سنر کو 9 فروری سے 4 مئی تک معطل کر دیا گیا ہے۔ وہ سال کے اگلے گرینڈ سلیم، فرنچ اوپن میں کھیلنے کے اہل ہوں گے، جو 19 مئی سے شروع ہو رہاہے ۔ سنیچر کو اسکائی اسپورٹس کو انٹرویو دیتے ہوئے سنر نے کہا کہ انہوں نے پابندی کو قبول کیا، حالانکہ وہ اس سے متفق نہیں تھے۔ انہوں نے کہا کہ انہیں کم سے کم بدترین آپشن کا انتخاب کرنا تھا۔ سنر نے کہا، “میں نے جو کچھ برداشت کیا ہے وہ قدرے غیر منصفانہ ہے، لیکن اگر ہم صورت حال کو دیکھیں تو یہ مزید خراب ہو سکتا تھا۔ فیصلہ کرنے کے بعد مجھے اپنے پیروں پر کھڑا ہونے میں کچھ وقت لگا۔ میں جانتا ہوں کہ کیا ہوا تھا اور میں بے قصور ہوں۔اس سال کے شروع میں آسٹریلین اوپن جیتنے کے بعد سے کورٹ سے دور رہنے کے باوجود، سنر اب بھی اے ٹی پی ٹور کی عالمی درجہ بندی میں سرفہرست ہیں، جب کہ کارلوس الکاراز اور الیگزینڈر زویریف ان کی غیر موجودگی کا فائدہ اٹھانے میں ناکام رہے ہیں۔ تین بار کا گرینڈ سلیم چیمپئن 7 مئی سے شروع ہونے والے روم ماسٹرز میں کلےپر اپنی مسابقتی واپسی کرنے کے لیے تیار ہے۔ سنر نے کہا کہ وہ دوبارہ کھیلنا شروع کرنے کا انتظار نہیں کر سکتے لیکن تسلیم کیا کہ ان کی واپسی کے بارے میں کچھ خدشات ہوں گے۔ جب ان سے پوچھا گیا کہ ان کے خیال میں ان کی ٹیم کے ساتھی ان کی واپسی پر کیا ردعمل ظاہر کریں گے تو انھوں نے کہا، ‘مجھے نہیں معلوم کہ کیا ہو سکتا ہے، مجھ پر اتنی توجہ ہونے کی وجہ سے واپسی کرنا مشکل ہو گا۔
