جے پور، 28 اپریل (یو این آئی) ویبھو سوریاونشی (101) کی شاندار سنچری اور یشسوی جیسوال (70 ناٹ آؤٹ) کی نصف سنچری کی بدولت راجستھان رائلز نے انڈین پریمیئر لیگ (آئی پی ایل) 2025 کے 47 ویں میچ میں گجرات ٹائٹنز کو پیر کو آٹھ وکٹ سے شکست دے دی۔ 210 رن کے ہدف کا تعاقب کرتے ہوئے راجستھان رائلز کی اوپننگ جوڑی ویبھو سوریاونشی اور یشسوی جیسوال نے پہلی وکٹ کے لیے 166 رن کی ریکارڈ شراکت قائم کی۔ آر آر کے ویبھو سوریاونشی نے ریکارڈ 35 گیندوں میں اپنی سنچری مکمل کی۔ سوریاونشی نے 101 رن کی طوفانی اننگز کھیلی انہوں نے 38 گیندوں کی اننگز میں 11 چھکے اور سات چوکے لگائے۔ 12ویں اوور میں پرسدھ کرشنا نے ویبھو سوریاونشی کو بولڈ کر دیا۔ راجستھان کا دوسرا وکٹ نتیش رانا (چار) کی صورت میں گرا۔ انہیں راشد خان نے ایل بی ڈبلیو آؤٹ کیا۔راجستھان رائلز نے 15.5 اوور میں دو وکٹ کے نقصان پر 212 رن بناکر میچ آٹھ وکٹ سے جیت لیا۔ یشسوی جیسوال نے 40 گیندوں پر نو چوکوں اور دو چھکوں کی مدد سے ناٹ آؤٹ 70 رن بنائے۔ کپتان ریان پراگ نے 15 گیندوں میں دو چوکوں اور دو چھکوں کی مدد سے 32 رن بنائے۔ گجرات ٹائٹنز کی جانب سے پرسدھ کرشنا اور راشد خان نے ایک ایک بلے باز کو آؤٹ کیا۔اس سے قبل آج راجستھان رائلز کے کپتان ریان پراگ نے ٹاس جیت کر پہلے گیند بازی کرنے کا فیصلہ کیا۔ بیٹنگ کے لیے اتری گجرات ٹائٹنز کے سائی سدرشن اور کپتان شھبمن گل کی اوپننگ جوڑی نے اچھی شروعات کی اور پہلی وکٹ کے لیے 93 رن جوڑے۔ مہیش تھیکشنا نے 11ویں اوور میں سائی سدرشن کو آؤٹ کر کے اس شراکت کو توڑا۔ سائی سدرشن نے 30 گیندوں میں چار چوکوں اور ایک چھکے کی مدد سے (39) رن بنائے۔ اس کے بعد جوس بٹلر بیٹنگ کے لیے آئے اور شبھمن گل کے ساتھ مل کر اننگز کو سنبھالا۔ دونوں بلے بازوں نے دوسری وکٹ کے لیے 74 رن کی شراکت ہوئی۔ 17ویں اوور میں مہیش تھیکشنا نے سنچری کی طرف بڑھ رہے شبھمن گل کو آؤٹ کر کے گجرات کو بڑا جھٹکا دیا۔ شبھمن گل نے 50 گیندوں پر 5 چوکوں اور 4 چھکوں کی مدد سے 84 رن بنائے۔ واشنگٹن سندر (13) اور راہول تیوتیا (نو) رن بناکر آؤٹ ہوئے۔ گجرات ٹائٹنز نے مقررہ 20 اووروں میں چار وکٹ پر 209 رن بنائے۔ جوس بٹلر نے 26 گیندوں میں تین چوکوں اور چار چھکوں کی مدد سے ناٹ آؤٹ 50 رن بنائے۔ شاہ رخ خان (پانچ) رن بناکر ناٹ آؤٹ رہے۔راجستھان رائلز کی جانب سے مہیش تھیکشنا نے دو وکٹ لیے۔ جوفرا آرچر اور سندیپ شرما نے ایک ایک بلے باز کو آؤٹ کیا۔
