بھوپال:13؍جون:مدھیہ پردیش پولیس کی جانب سے مسلسل پولیس افسران اور ملازمین کو فائر سیفٹی کی تربیت دی جا رہی ہے۔ اسی سلسلے میں ہفتہ کی شام پولیس ہیڈکوارٹر کے گراؤنڈ فلور پر سکیورٹی اہلکاروں اور ملازمین کو خود کو محفوظ رکھتے ہوئے آگ پر قابو پانے کی تربیت دی گئی۔ آگ پر قابو پانے سے متعلق اس تربیتی پروگرام میں جدید آلات کے ذریعے آگ بجھانے کی موک ڈرل بھی کی گئی۔ موک ڈرل کے دوران پولیس اہلکاروں نے یہ تربیت حاصل کی کہ مائع مادّوں میں لگنے والی آگ کو فائر فائٹنگ آلات کے استعمال سے کس طرح آسانی سے بجھایا جا سکتا ہے۔ سکیورٹی اہلکاروں نے دھوئیں اور شعلوں سے محفوظ رہتے ہوئے آگ بجھانے کی تربیت حاصل کی اور عملی مشق بھی کی۔ موک ڈرل میں بالخصوص پولیس ہیڈکوارٹر کے سکیورٹی انچارج مسٹر مکیش سینی، انسپکٹر وجے ناگلے، پولیس فائر اسٹیشن بھوپال کے ایس آئی مسٹر شیونارائن شرما اور ان کی ٹیم موجود تھی۔
موک ڈرل کے دوران پولیس افسران اور ملازمین کو آگ بجھانے میں استعمال ہونے والے جدید آلات کے بارے میں معلومات دی گئیں۔ آگ بجھانے کے دوران استعمال ہونے والے کلیکٹنگ برج، ڈیوائیڈنگ برج، فائر مین ہیلمٹ، فوم نوزل، فائر فائٹنگ سلنڈر اور کارٹیج، ٹارچ، ریوالونگ نوزل، یونیورسل برانچ، نیو لائٹ (برانچ)، آرڈنری برانچ، ایڈاپٹر، جالی، فائر مین ایکس، لاک کٹر، پراکسیمیٹی سوٹ، ایلومینیم سوٹ، کیمیکل سوٹ، بریتھنگ آپریٹر سیٹ، لائف جیکٹ، ہوز پائپ، فائر بلینکٹ، فائر ایکسٹنگوئشر وغیرہ کے بارے میں معلومات فراہم کی گئیں۔
آگ کی 5 اقسام ہوتی ہیں، بجھاتے وقت احتیاط برتیں
تربیت کے دوران ایس آئی مسٹر شیونارائن شرما نے بتایا کہ آگ پانچ اقسام کی ہوتی ہے اور ہر قسم کی آگ بجھانے کا طریقہ الگ ہوتا ہے۔ انہوں نے بتایا کہ ان کو اے سے ای تک مختلف زمروں میں رکھا گیا ہے۔ لکڑی اور کوئلے میں لگنے والی چھوٹی آگ کو اے کلاس میں رکھا جاتا ہے۔ مائع مادّوں میں لگنے والی آگ بی کلاس، گیسوں میں لگنے والی آگ سی کلاس، دھاتوں میں لگنے والی آگ ڈی کلاس اور برقی آگ کو ای کلاس میں رکھا جاتا ہے۔ ان تمام اقسام کی آگ کو پانی یا کیمیکل کی مدد سے بجھایا جاتا ہے۔
٭ فائر بریگیڈ، پولیس کنٹرول روم، پولیس تھانہ، محکمہ بجلی اور اسپتال کو اطلاع دیں۔
٭ فائر فائٹنگ ٹیم فائر ایکسٹنگوئشر، پانی یا ریت کی مدد سے ابتدائی مرحلے میں آگ بجھانے کی کوشش کرے۔ عمارت کی بجلی مین سوئچ سے فوراً منقطع کر دی جائے۔
٭ فائر الارم ٹیم تمام افراد کو الارم بجا کر آگ لگنے کی اطلاع دے۔
٭ ریسکیو ٹیم (ایویکیوشن ٹیم) عمارت میں موجود افراد کو پہلے سے طے شدہ منصوبے کے مطابق محفوظ راستوں سے نکال کر محفوظ مقام تک پہنچائے۔
٭ بھگدڑ نہ مچائیں۔
٭ لفٹ کا ہرگز استعمال نہ کریں۔
٭ قیمتی اور اہم سامان کو محفوظ مقام پر منتقل کریں۔
٭ انتہائی آتش گیر اشیاء جیسے پٹرول، مٹی کا تیل، پلاسٹک وغیرہ کو آگ لگنے کی جگہ سے دور کریں۔
ان نمبروں پر اطلاع دیں
آگ لگنے کی اطلاع دینے کے لیے بھوپال میں ایم پی ای بی کے ہیلپ لائن نمبر 0755-2678251، 0755-2678369، پولیس ہیلپ لائن نمبر 0755-2555922، پولیس فائر اسٹیشن ہیلپ لائن نمبر 0755-2441008 اور نگر نگم ہیلپ لائن نمبر 0755-2542222 پر کال کی جا سکتی ہے۔
