بھوپال 19جنوری: وزیرِ اعلیٰ ڈاکٹر موہن یادو نے کہا ہے کہ سوامی وویکانند کی یہ پیش گوئی کہ اکیسویں صدی بھارت کی ہوگی، آج وزیرِ اعظم مسٹر نریندر مودی کی قیادت میں حقیقت بنتی دکھائی دے رہی ہے۔ ہر عالمی پلیٹ فارم پر بھارت نے اپنی ساکھ قائم کی ہے اور وزیرِ اعظم مسٹرمودی دنیا کے سب سے بااثر رہنماؤں میں شامل ہیں۔ بھارت آج دنیا کی قیادت کی سمت میں آگے بڑھ رہا ہے، جو دنیا کا سب سے نوجوان جمہوری ملک ہے اور وزیرِ اعظم مسٹرمودی مؤثر انداز میں اس نوجوان جمہوریت کی قیادت کر رہے ہیں۔ مدھیہ پردیش کے کونے کونے سے آئے ہوئے نوجوان منظم ہو کر دہلی میں تعلیم حاصل کر رہے ہیں، یہ ریاست کے لیے خوش قسمتی کی بات ہے۔ انہوں نے کہا کہ اتنی بڑی تعداد میں ریاست کے نوجوانوں سے ملاقات نے ان کے دہلی کے دورے کو بامقصد بنا دیا ہے۔ وزیرِ اعلیٰ ڈاکٹر یادو پیر کے روز دہلی یونیورسٹی کے شنکرلال آڈیٹوریم میں مدھیہ پردیش کے زیرِ تعلیم طلبہ کی تنظیم مدھیانچل اسٹوڈنٹ ایسوسی ایشن کے زیرِ اہتمام منعقد مدھیانچل اْتسو 2026 سے خطاب کر رہے تھے۔ مدھیانچل اْتسو کا افتتاح وزیرِ اعلیٰ ڈاکٹر یادو نے چراغ روشن کر کے کیا۔
وزیرِ اعلیٰ ڈاکٹر یادو نے کہا کہ مدھیہ پردیش ملک کی کم ترین بے روزگاری والی ریاستوں میں شامل ہے اور ریاستی حکومت ہر قدم پر نوجوانوں کے ساتھ ہے۔ نوجوانوں کو بااختیار بنانا ریاستی حکومت کی ترجیح ہے۔ ریاست میں سرمایہ کاری، صنعت اور روزگار کے لیے ہر طرح کی سازگار سہولتیں دستیاب ہیں۔ وزیرِ اعلیٰ ڈاکٹر یادو نے کہا کہ ہمارا ہدف یہ ہے کہ مدھیہ پردیش کا نوجوان نوکری تلاش کرنے والا نہیں بلکہ نوکری پیدا کرنے والا بنے۔
نوجوان زرعی ٹیکنالوجی اور طب سمیت تمام شعبوں میں آگے بڑھیں، مصنوعی ذہانت سمیت عالمی سطح پر ہونے والی تمام اختراعات میں مہارت حاصل کریں اور ملک و ریاست کو مضبوط بنانے میں اپنا کردار ادا کریں، یہی ہمارا مقصد ہے۔
وزیرِ اعلیٰ ڈاکٹر یادو نے ریاست کی کامیابیوں کی معلومات دیتے ہوئے بتایا کہ ریاست میں آبپاشی کے رقبے میں اضافہ ہوا ہے۔ آئندہ پانچ برسوں میں ریاست کے بجٹ کو دوگنا کرنے کا ہدف مقرر کیا گیا ہے۔ انہوں نے کہا کہ پی پی پی ماڈل کے تحت زیادہ سے زیادہ میڈیکل کالج کھولے جا رہے ہیں۔ حکومت کا مقصد نیٹ امتحان پاس کرنے والے طلبہ کے ذریعے ریاست میں ڈاکٹروں کی تعداد میں اضافہ کرنا ہے۔ انہوں نے بتایا کہ ریاست میں ٹیکسٹائل صنعت قائم کرنے پر ہر مزدور کے لیے ماہانہ پانچ ہزار روپے کی معاونت رقم حکومت کی جانب سے دی جائے گی، جس سے روزگار کے مواقع بڑھیں گے۔ وزیرِ اعلیٰ ڈاکٹر یادو نے بتایا کہ نوجوانوں کی مدد کے لیے ریاستی حکومت کی پالیسیوں میں خصوصی دفعات شامل کی گئی ہیں۔
وزیرِ اعلیٰ ڈاکٹر یادو نے کہا کہ مدھیہ پردیش بجلی میں سرپلس ریاست ہے اور قابلِ تجدید توانائی میں سب سے کم نرخ پر بجلی فراہم کی جا رہی ہے، جس کی قیمت صرف دو روپے دس پیسے ہے، جو ملک میں سب سے کم ہے۔ انہوں نے کہا کہ دہلی کی میٹرو مدھیہ پردیش کی بجلی سے چل رہی ہے۔ ریاست میں مائننگ سیکٹر میں تیزی سے کام ہو رہا ہے اور حیاتیاتی تنوع کے معاملے میں بھی ریاست سرِفہرست ہے۔ بھوپال کے بڑے تالاب میں شکارے چلائے جا رہے ہیں اور فلم اور سیاحت کی پالیسی کے ذریعے سرمایہ کاروں اور نوجوانوں کو خصوصی فوائد دیے جا رہے ہیں۔ وزیرِ اعلیٰ ڈاکٹر یادو نے مدھیانچل طلبہ تنظیم کو اس خصوصی پروگرام کے انعقاد پر مبارک باد دی۔ وزیرِ اعلیٰ ڈاکٹر یادو نے کہا کہ تمام طلبہ اسی طرح منظم ہو کر مثبت کام کرتے ہوئے ریاست اور ملک کی ترقی میں فعال کردار ادا کرتے رہیں
