بھوپال:11؍مارچ:ریاست کے سرکاری اسکولوں میں 9ویں کلاس میں داخلہ لینے والے طلبہ کے مطالعہ کی سطح اور کارکردگی کو بہتر بنانے کے لیے محکمہ اسکولی تعلیم برج کورس کا انعقاد کر رہا ہے۔ اس کے لیے ہندی، انگریزی اور ریاضی مضامین کے 9 ہزار 312 ریسورس پرسن تیار کیے گئے ہیں۔ ان کی تربیت فروری مہینے میں بھوپال کے والمی انسٹی ٹیوٹ میں ہوئی تھی۔ ریاست میں 4 ہزار 200 ہائی اسکول اور 4 ہزار 100 ہائر سیکنڈری سرکاری اسکول ہیں۔ اب مارچ ماہ سے ان اسکولوں میں ہندی، انگریزی اور ریاضی کے لیے ایک ایک استاد کو تربیت دینے کا انتظام شروع کیا گیا ہے۔ ریاست میں تقریباً 27 ہزار اساتذہ کو برج کورس کی تربیت دی جا رہی ہے۔ برج کورس سے سرکاری اسکولوں کو ڈراپ آؤٹ کی شرح کم کرنے میں مدد ملے گی۔
تربیت یافتہ اساتذہ اپریل ماہ میں اور 16 جون سے 20 جولائی تک برج کورس کرائیں گے۔ تمام سرکاری ہائی اور ہائر سیکنڈری اسکولوں میں برج کورس کرایا جائے گا۔ اس کے ساتھ ان 3 مضامین کے علاوہ سائنس اور سنسکرت مضامین بھی ان بچوں کو پڑھائے جائیں گے۔ ڈائریکٹوریٹ آف پبلک انسٹرکشن نے اسکولوں میں منعقد ہونے والے برج کورس کا ٹائم ٹیبل بھی تیار کر لیا ہے۔
برج کورس کے دوران ہی 5 اور 12 اپریل کو ان طلباء کا انگریزی، ریاضی اور ہندی میں بیس لائن ٹیسٹ لیا جائے گا۔ بیس لائن ٹیسٹ کے پرچے 31 مارچ کو اسکول ایجوکیشن ڈیپارٹمنٹ کے “ویمرش” پورٹل پر اپ لوڈ کیے جائیں گے۔ اس سلسلے میں ڈسٹرکٹ ایجوکیشن آفیسرس کو ہدایات دے دی گئی ہیں۔ جو طلبہ بعض وجوہات کی بنا پر مقررہ تاریخوں پر امتحان دینے سے قاصر ہیں ان کے لیے علیحدہ انتظامات کیے گئے ہیں۔ اسی دن متعلقہ اساتذہ کے ذریعہ بیس لائن ٹیسٹ کی جوابی کاپی جانچنے کے انتظامات کئے گئے ہیں۔ بیس لائن ٹیسٹ میں کم مہارت رکھنے والے طلبہ کے لیے انگریزی، ہندی اور ریاضی کے برج کورسز کا اہتمام کیا گیا ہے۔
سرکاری ہائی اور ہائر سیکنڈری اسکولوں میں برج کورس کے اختتام پر 20 جولائی کے بعد طلباء کے معیار کو جانچنے کے لیے اینڈ لائن ٹیسٹ کے لیے بھی انتظامات کیے جا رہے ہیں۔ یہ امتحان 21 سے 25 جولائی کے درمیان منعقد ہوگا۔ اس سلسلے میں ڈائریکٹوریٹ آف پبلک انسٹرکشن نے تمام سرکاری اسکولوں کو ہدایات جاری کر دی ہیں۔ برج کورس کی نگرانی کے لیے ریاست، ڈویزن اور ضلع سطح کے افسران 3 سطحوں پر باقاعدہ نگرانی کریں گے۔ ڈسٹرکٹ ایجوکیشن آفیسر کو ماہانہ کم از کم 10 سکولوں کی نگرانی کرنے کو کہا گیا ہے۔ ڈسٹرکٹ پروجیکٹ کوآرڈینیٹر اور بلاک ایجوکیشن آفیسر اس کام میں اس کی مدد کریں گے۔
برج کورس کے انعقاد کے دوران، ضلع سطح کے افسر رینڈملی کم سے کم 10فیصد طلباء کی جوابی کاپیاں ضلع سطح پر بلاکر دوبارہ تخمینہ کریں گے۔ ان بچوں کی استعداد کار بڑھانے کے لیے عوامی تعلیمی ڈائریکٹوریٹ سطح پر سال بھر مسلسل کوششیں کی جائیں گی۔
