بھوپال 3جنوری۔ رات گئے تک دکانیں کھولنے کو لے کر شہر میں کافی عرصے سے تنازعہ چل رہا ہے۔ اس کے لیے ضلع بی جے پی اور دیگر تنظیموں نے پولس انتظامیہ سے تحریری شکایت بھی کی تھی کہ رات گیارہ بجے کے بعد دکانیں کھلنے کی وجہ سے مجرمانہ واقعات رونما ہوتے ہیں۔ اس کی وجہ سے کلکٹر آشیش سنگھ نے اب ہدایات دی ہیں کہ بدھ سے تمام قسم کی دکانیں رات 11 بجے تک بند کر دی جائیں۔ اس کے بعد اگر کوئی دکان کھلی پائی گئی تو دکاندار کے خلاف کارروائی کی جائے گی۔ ان ہدایات کو نافذ کرنے کے لیے پولیس، انتظامیہ کے افسران اور میونسپل کارپوریشن کے اہلکار اپنے عملے کے ساتھ میدان میں آگئے ہیں۔
جانکاری کے مطابق افسروں نے پرانے شہر کے قاضی کیمپ، لکشمی ٹاکیز، بھوپال ٹاکیز، نادرا بس اسٹینڈ اور دیگر علاقوں میں پہنچ کر دکانداروں کو سمجھایا کہ وہ بدھ سے رات 11 بجے دکانیں بند کردیں۔ اس کے علاوہ کارپوریشن کے عملے نے لاؤڈ اسپیکر کے ذریعے اعلان کیا اور لوگوں کو ہدایات کی وضاحت کی۔افسروں نے یہ بھی کہا کہ میڈیکل شاپس اور اسپتالوں کو بروقت نرمی دی گئی ہے۔ دیگر تمام دکانیں اور ادارے رات 11 بجے بند ہو جائیں گے۔ اگر ان ہدایات پر عمل نہ کیا گیا اور دکانیں یا ادارے کھلے پائے گئے تو ان کے خلاف کارروائی کی جائے گی۔ اس دوران سٹی ایس ڈی ایم امن مشرا، اے سی پی کوتوالی انیتا پربھا شرما اور دیگر افسران موجود تھے۔
اے سی پی انیتا شرما نے کہا کہ ضلع انتظامیہ کی ہدایات کے مطابق شہر کے بازار بدھ سے رات 11 بجے بند رہیں گے۔ شراب کی دکانیں رات 11.30 بجے تک کھلی رہ سکتی ہیں۔ میونسپل کارپوریشن کے ٹریڈ لائسنس کے تحت دکانیں رات 11 بجے بند ہونے کی بات ہوتی ہے لیکن پرانے شہر کے بازار دیر رات تک کھلے رہتے ہیں۔ پولیس کی ٹیمیں بدھ سے ان دکانوں کی نگرانی کریں گی۔ مقررہ وقت کے بعد کھلنے والی دکانوں کو سیل کر دیا جائے گا۔
