بھوپال 9مارچ: وزیرِ اعلیٰ ڈاکٹر موہن یادو نے کہا ہے کہ وزیرِ اعظم مسٹر نریندرمودی کی مؤثر قیادت میں ماؤں اور بہنوں کی صحت کا خیال رکھنا ریاستی حکومت کی سب سے بڑی ترجیح ہے۔ سروائیکل کینسر بیٹیوں کی زندگی میں ایک بہت مشکل مرحلہ ہوتا ہے۔ مدھیہ پردیش میں بڑے پیمانے پر ایچ پی وی ویکسینیشن مہم شروع کی گئی ہے۔ اس کے تحت 14 سال سے زیادہ عمر کی بیٹیوں کو تقریباً 4 ہزار روپے مالیت کا یہ ٹیکہ مفت لگایا جا رہا ہے۔ ویکسین کا ایک ٹیکہ مستقبل میں بچیوں کو رحم اور گریوا کے کینسر سے زندگی بھر کی حفاظت کی ضمانت دے گا اور انہیں اس سنگین بیماری سے بچائے گا۔ وزیرِ اعلیٰ ڈاکٹر موہن یادو پیر کے دن جبلپور کے نیتاجی سبھاش چندر بوس کلچرل اینڈ انفارمیشن سینٹر میں خواتین کے لیے منعقد مفت طبی کیمپ اور ایچ پی وی ویکسینیشن پروگرام سے خطاب کر رہے تھے۔وزیرِ اعلیٰ ڈاکٹر موہن یادو نے اپیل کی کہ بہنیں اور بیٹیاں سروائیکل کینسر سے بچاؤ کے لیے ویکسینیشن کا فائدہ ضرور اٹھائیں اور ٹیکہ لگوائیں۔ وزیرِ اعلیٰ مسٹر موہن یادو نے ٹیکہ لگوا چکی بیٹیوں کو اسناد بھی فراہم کیں۔ اس کے ساتھ ہی انہوں نے جبلپور میں 37 کروڑ روپے سے زیادہ لاگت کے مختلف ترقیاتی کاموں کا افتتاح اور سنگِ بنیاد بھی رکھا۔وزیرِ اعلیٰ ڈاکٹر موہن یادو نے کہا کہ ریاستی حکومت لاڈلی بہنوں سے لے کر لاڈلی لکشمی بیٹیوں تک مسلسل عوامی فلاح کے کاموں کو آگے بڑھا رہی ہے۔ لاڈلی بہنوں کو معاشی طور پر مضبوط بنانے کے لیے حکومت اس منصوبے کی رقم میں مسلسل اضافہ کر رہی ہے۔ ریاست کی ایک کروڑ پچیس لاکھ سے زیادہ لاڈلی بہنوں کو اب ہر ماہ 1500 روپے کی رقم ان کے بینک کھاتوں میں منتقل کی جا رہی ہے۔
ریاستی حکومت نے بہنوں کو روزگار سے متعلق صنعتوں میں کام کرنے پر اضافی طور پر 5 ہزار روپے کی حوصلہ افزائی رقم دینے کا بھی فیصلہ کیا ہے۔ ریاست میں صنفی عدم مساوات ختم کرنے کی سمت میں نمایاں کام ہو رہے ہیں۔ مقامی اداروں کے انتخابات میں خواتین کو 50 فیصد ریزرویشن دیا گیا ہے۔ لوک سبھا اور ودھان سبھا میں بھی خواتین کو 33 فیصد ریزرویشن کا فائدہ ملے گا۔ بیٹیاں فوج سے لے کر ہر شعبے میں آگے بڑھ کر بہتر مستقبل کی تعمیر کر رہی ہیں۔وزیرِ اعلیٰ ڈاکٹر موہن یادو نے کہا کہ انہوں نے 8 مارچ کوبین الاقوامی یوم خواتین کے موقع پر اشوک نگر ضلع میں کریلا دھام پہنچ کر ماتا جانکی اور ان کے بیٹوں لو اور کش کا آشیرواد حاصل کیا اور ریاست کے تمام باشندوں کی بھلائی کی دعا کی۔
وزیرِ اعلیٰ ڈاکٹر موہن یادو نے جبَل پور میں 10.51 کروڑ روپے کی لاگت سے جدید جنپد بھون کا سنگِ بنیاد رکھا اور 27.16 کروڑ روپے کی لاگت سے تعمیر شدہ گیتا بھون سمیت 3 دیگر ترقیاتی کاموں کا افتتاح کیا۔ ان میں پرائمری ہیلتھ سینٹر، 21 صحت اور ذیلی صحت مراکز اور سولر ٹریفک سسٹم شامل ہیں۔ وزیرِ اعلیٰ مسٹر موہن یادو نے کہا کہ سنسکار دھانی جبَل پور کی خوبصورتی ملک میں منفرد ہے۔ انہوں نے پروگرام میں موجود شہریوں کو آئندہ نوراتری تہوار اور گڑی پڑوا کی مبارکباد بھی دی۔
نابینا طالبات کاکیا اعزاز
پروگرام میں وزیرِ اعلیٰ ڈاکٹر موہن یادو نے ایچ پی وی ویکسینیشن مکمل کر چکی طالبات جیا سین اور انشی وشوکرما کو علامتی طور پر اسناد فراہم کیں۔ انہوں نے نابینا گرلس اسکول جبلپور کی طالبات سے ملاقات کر کے ان کا اعزاز بھی کیا۔ اس موقع پر وزیرِ اعلیٰ ڈاکٹر موہن یادو نے لکھپتی دیدی آرتی چودھری اور سیتا گونڈ کو توصیف نامے بھی پیش کیں۔
سابق وزیر اجے وشنوئی نے کہا کہ وزیرِ اعظم مسٹرنریندر مودی ملک کی قیادت کرتے ہوئے ہر طبقے کی فلاح کے لیے مختلف منصوبے شروع کر رہے ہیں۔ بیٹیوں کو سروائیکل کینسر سے محفوظ رکھنے کے لیے شروع کیا گیا یہ ویکسینیشن پروگرام ایک سنگِ میل ثابت ہوگا۔ ملک اور ریاست کو آگے بڑھانے میں ماؤں اور بہنوں کا مکمل تعاون حکومت کو مل رہا ہے۔ ریاست کی آنگن واڑی اور ہیلتھ ورکرز کی مدد سے مختلف قسم کے کینسر کی شناخت کے لیے عوام میں بیداری پیدا کی جا سکتی ہے۔ پروگرام میں رکنِ اسمبلی مسٹرسنتوش برکڑے سمیت عوامی نمائندے، محکمہ صحت کے افسران، سماجی تنظیموں کے کارکنان، لاڈلی بہنیں اور بڑی تعداد میں بیٹیاں موجود تھیں۔
