نئی دہلی، 21 اگست (یو این آئی) حال ہی میں پیرس اولمپکس میں جیولن تھرو مقابلے میں چاندی کا تمغہ جیتنے والے ایتھلیٹ نیرج چوپڑا نے سمیت انتیل کو مشورہ دیا ہے کہ وہ پیرس پیرالمپکس میں کچھ نیا کرنے کی کوشش نہ کریں۔ انتیل نے پیرس پیرا اولمپکس سے قبل نیرج کے مشورے کو شیئر کرتے ہوئے کہا، نیرج بھائی کہتے ہیں کہ مجھے کچھ نیا نہیں کرنا چاہیے اور صرف پرسکون، صبر اور اپنی تیاری پر بھروسہ رکھنا چاہیے۔”
انتیل کا خیال ہے کہ اعتماد کے باوجود نیزہ کسی بھی وقت چوٹ پہنچا سکتا ہے۔ انہوں نے کہا کہ ان کی کمر میں چوٹ ہے جس کی امید ہے کہ وہ پیرس میں ہونے والے مقابلے کے آغاز سے قبل ٹھیک ہو جائے گی۔ انہوں نے کہا کہ اس بار ہم انجری سے بچنے کے لیے بہت محتاط ہیں۔ زخمی ہونے پر یہ تھرو پر اثر انداز ہوتا ہے۔ ابھی میری کمر میں معمولی سا کھینچاؤ ہے اور میں نہیں چاہتا کہ اس سے میری کارکردگی متاثر ہو۔ اس کے علاوہ میری تیاریاں اچھی جا رہی ہیں اور کوشش کروں گا کہ اچھی کارکردگی کا مظاہرہ کروں اور میڈل لے کر وطن واپس آوں۔ 28 اگست سے 8 ستمبر تک منعقد ہونے والے آئندہ پیرالمپکس گیمز میں ہندوستانی دستے کے پرچم برداروں میں سے ایک انریل نے سائی میڈیا سے بات چیت کرتے ہوئے کہا کہ وہ نیرج چوپڑا سے متاثر ہیں جنہوں نے پیرس اولمپکس میں جیولن تھرو ایونٹ میں چاندی کا تمغہ جیتا تھا۔ قابل ذکر ہے کہ ہریانہ کے جیولن تھرو ایتھلیٹ انتیل نے ٹوکیو میں اپنے مقابلے میں تین بار عالمی ریکارڈ توڑا ہے اور ایف-64 کیٹیگری میں 68.55 میٹر کی دوری سے جیولن پھینک کر گولڈ میڈل حاصل کیا تھا۔ سونی پت کے 26 سالہ اسپورٹس ہیرو انتیل نے 2015 میں ایک حادثے میں اپنی بائیں ٹانگ کھو دی تھی۔
