لکھنؤ10جنوری: اتر پردیش حکومت نے مدرسہ کے اساتذہ کے اعزازیہ کو روک دیا ہے، جس میں اکھلیش حکومت کے دوران اضافہ کیا گیا تھا۔ پہلے مرکزی حکومت نے مدرسہ کے اساتذہ کا اعزازیہ روک دیا تھا اور اب یوگی حکومت نے بھی اس پر روک لگا دی ہے۔ نیوز پورٹل ’آج تک‘ کی رپورٹ کے مطابق، اب مرکزی حکومت اور ریاستی حکومت کی طرف سے مدرسہ کے اساتذہ کو کوئی اعزازیہ نہیں دیا جائے گا۔ اس فیصلے کے بعد مدرسہ کے تقریباً 25 ہزار اساتذہ کا اعزازیہ ختم ہو گیا ہے۔ معلومات کے مطابق مدرسہ ماڈرنائزیشن اسکیم جو 1993-94 سے چل رہی ہے مرکزی حکومت کی اسکیم ہے۔
اس کے تحت مدرسہ میں ہندی، انگریزی، سائنس، ریاضی اور سماجی علوم پڑھانے کے لیے اساتذہ کا تقرر کیا گیا تھا۔ سال 2008 میں مدرسہ میں معیاری تعلیم کی فراہمی کی یہ اسکیم چلائی جانے لگی۔ اس سکیم کے تحت 25000 اساتذہ کی خدمات حاصل کی گئیں جس میں گریجویٹ اساتذہ کو 6000 روپے اور ماسٹرز مکمل کر چکے اساتذہ کو 12000 روپے ماہانہ اعزازیہ دیا جاتا تھا۔ سال 2016 میں سماج وادی پارٹی کی حکومت نے 2000 اور 3000 روپے ماہانہ اعزازیہ دینے کا فیصلہ کیا تھا۔ اس کے بعد مدرسہ کے فارغ التحصیل اساتذہ کو 8000 روپے اور پوسٹ گریجویٹ اساتذہ کو 15000 روپے اعزازیہ دیا جا رہا ہے۔ دراصل، اس اسکیم کو مرکزی حکومت نے صرف 2021-22 تک ہی منظوری دی تھی جس میں مرکزی حکومت پہلے سے ہی اعزازیہ نہیں دے رہی تھی۔ اس کے باوجود بجٹ میں اضافی اعزازیہ کا نظام ختم کر دیا گیا ہے۔ اب اس اعزازیہ کے لیے کوئی مالی منظوری جاری نہیں کی گئی ہے۔ اس وجہ سے تمام اضلاع کو احکامات بھیج کر اعزازیہ کی ادائیگی پر پابندی لگا دی گئی ہے۔
