لندن، 09 جون (یو این آئی) ہندوستانی مردوں کی ہاکی ٹیم کو ایف آئی ایچ پرو لیگ 2023-24 ٹورنامنٹ میں جرمنی کے خلاف 3-2 سے شکست کا سامنا کرنا پڑا۔ لندن کے لی ویلی ہاکی اسٹیڈیم میں ہفتے کو کھیلے گئے میچ میں جرمنی نے شاندار آغاز کیا اور مسلسل دو پنالٹی کارنر حاصل کیے۔ پہلا موقع ضائع کرنے کے بعد جرمنی کے گونزالو پیلاٹ نے دوسرے ہی منٹ میں اپنی ٹیم کو 1-0 کی برتری دلا دی۔ اس کے بعد کرسٹوفر رور نے 10ویں منٹ میں فیلڈ گول کر کے برتری کو دگنا کر دیا۔ جرمنی نے پہلے کوارٹر میں دو گول کیے جب کہ ہندوستانی ٹیم گول کرنے میں ناکام رہی۔ جرمنی نے دوسرے کوارٹر میں بھی اپنی لے برقرار رکھی۔ ہندوستانی ٹیم نے میچ میں واپسی کی اور 19ویں منٹ میں کپتان ہرمن پریت سنگھ نے ڈریگ فلک کی مدد سے پنالٹی کارنر کو گول میں بدل دیا۔ اس کے بعد ہندوستان نے میچ میں اپنی گرفت مضبوط کی اور مسلسل دو پنالٹی کارنر حاصل کیے لیکن ٹیم سکور برابر نہ کر سکی۔ پہلے ہاف کے اختتام پر جرمنی نے 2-1 کی برتری برقرار رکھی۔ جرمنی نے تیسرے کوارٹر میں ہندوستان پر اپنا تسلط برقرار رکھا اور 33ویں منٹ میں گونزالو نے پنالٹی کارنر سے گول اسکور کیا۔ چوتھے کوارٹر میں اسکور برابر کرنے کے ارادے سے میدان میں اترنے والی ہندوستانی ٹیم نے شاندار کھیل کا مظاہرہ کیا اور 48ویں منٹ میں ہندوستان کی جانب سے سکھجیت سنگھ نے فیلڈ گول کرکے اسکور 3-2 کردیا۔ آخری وقت میں ہندوستانی ٹیم کوئی گول نہ کر سکی اور جرمنی نے یہ میچ 3-2 سے جیت لیا۔ ہندوستانی ٹیم کی جانب سے ہرمن پریت سنگھ (19ویں منٹ) اور سکھجیت سنگھ (48ویں منٹ) نے گول کیے جبکہ جرمنی کی جانب سے گونزالو پیلیٹ (2ویں اور 33ویں منٹ) اور کرسٹوفر روہر (10ویں منٹ) نے گول کئے۔
