نارتھمپٹن، 18 مئی (یو این آئی) انگلینڈ کے خلاف دوسرے ٹی 20 میچ میں پاکستان کی شکست کے باوجود ندا ڈار ٹی 20 میں سب سے زیادہ وکٹیں لینے والی گیندباز بن گئی ہیں۔ ڈار جمعہ کو آسٹریلیا کی میگن اسکٹ (136 وکٹیں) کو پیچھے چھوڑ کر خواتین کے ٹی ٹوئنٹی میں سب سے زیادہ وکٹیں لینے والوں کی فہرست میں سرفہرست ہیں۔ ٹاپ 10 کی فہرست میں وہ واحد پاکستانی خاتون ہیں۔ اس سے قبل ویسٹ انڈیز کے خلاف ہوم سیریز میں ڈار 135 وکٹیں لے کر اسکٹ کا ریکارڈ برابر کرنے کے بہت قریب پہنچ گئی تھیں۔ برمنگھم میں انگلینڈ کے خلاف پہلے میچ میں وہ کوئی وکٹ نہیں لے سکی تھیں جس میں پاکستان کو 53 رن سے شکست ہوئی تھی۔دوسرے میچ میں انگلینڈ نے پہلے بیٹنگ کرتے ہوئے مایا باؤچیئر، ایلس کیپسی اور نیٹ سائیور برنٹ کی مفید شراکت سے چھ وکٹوں پر 144 رن بنائے۔ پاکستان کی گیندباز کافی حد تک موثر تھیں جنہوں نے رن کی رفتار کو محدود کیا اور وقفے وقفے سے وکٹیں حاصل کیں۔ڈار نے 12ویں اوور میں کیپسی کی وکٹ لے کر اسکٹ کی برابری کی اور پھر آخری اوور میں گیندبازی کرتے ہوئے ایمی جونز کو آؤٹ کر دیا جس سے ڈار کو یہ سنگ میل ملا۔پاکستان کو ابتدائی طور پر مسائل کا سامنا کرنا پڑا کیونکہ وہ شراکت داری کے لیے جدوجہد کر رہے تھے۔ منیبہ اور عالیہ ریاض نے کچھ مقابلہ کیا لیکن یہ انگلش گیند بازوں کو روکنے کے لیے کافی نہیں تھا۔مہمان ٹیم آخر کار صرف 79 رن پر سمٹ گئی، جس سے انگلینڈ کو 65 رن کی جیت اور تین میچوں کی سیریز میں 2-0 کی ناقابل تسخیر سبقت حاصل ہوگئی۔آخری ٹی ٹوئنٹی میچ 19 مئی کو لیڈز میں کھیلا جائے گا۔ اس کے بعد دونوں ٹیمیں 23 سے 29 مئی تک تین ون ڈے میچوں کی سیریز کھیلیں گی۔مختصر اسکور:انگلینڈ ویمن 144/6۔پاکستانی خواتین 79۔
