پٹنہ3جنوری: اس سال ہونے والے لوک سبھا انتخابات کے پیش نظر سیاسی جماعتوں کے درمیان الزامات اور جوابی الزامات زور پکڑ رہے ہیں۔ آر جے ڈی لیڈر اور نائب وزیر اعلی تیجسوی یادو نے بدھ کو کہا کہ انتخابات تک ہندو مسلم، مندر مسجد جیسے مسائل آتے رہیں گے۔ صحافیوں سے بات چیت کے دوران جب تیجسوی سے سی اے اے سے متعلق سوال پوچھا گیا تو انہوں نے کہا کہ اس پر ابھی کیا کہا جا سکتا ہے! کئی بار ایسا ہوتا ہے کہ کوئی چیز غبارے کی طرح چھوڑ دی جاتی ہے، اس کے بارے میں بیانات دئیے جاتے ہیں اور کچھ نہیں ہوتا۔ انہوں نے کہا کہ آپ لوگ جانتے ہیں کہ آر جے ڈی کا کیا موقف رہا ہے۔ جب الیکشن آئیں گے، ہندو مسلم، مندر مسجد، جیسے مسائل آتے رہیں گے۔ ای ڈی کی طرف سے کی جا رہی کارروائی پر انہوں نے کہا کہ یہ پہلی بار نہیں ہے، نہ پہلی بار ہے اور نہ ہی آخری بار ہے۔ جب تک الیکشن ہوتے رہیں گے ایسا ہوتا رہے گا، ہم تو پہلے ہی کہہ چکے ہیں۔ تیجسوی نے مزید کہا کہ تفتیشی ایجنسیاں بھی دباؤ میں کام کر رہی ہیں۔ اب اس پر بار بار صفائی دینا درست نہیں۔ انڈیا الائنس سے متعلق ایک سوال پر نائب وزیر اعلیٰ نے کہا کہ انہوں نے ابھی سب سے بات کی ہے۔ سب سے بات کرنے کے بعد ہی تاریخ طے کی جائے گی۔ ابھی یہ واضح نہیں ہے کہ یہ اجلاس کب ہوگا اور کیسے ہوگا۔
