رتلام، 23 مارچ: ضلع کے آلوٹ اسمبلی سے کانگریس کے سابق ایم ایل اے منوج چاولہ اور کانگریس کے سابق ریاستی ترجمان پرمود گگلیا نے ہفتہ کو بی جے پی میں شمولیت اختیار کی۔ رتلام میں وزیر اعلیٰ ڈاکٹر موہن یادو نے انہیں اور ان کے حامی کارکنوں کو بی جے پی کی رکنیت دلائی۔دراصل سابق ایم ایل اے منوج چاولہ نے پہلے ہی کانگریس سے استعفیٰ دے دیا تھا۔ مدھیہ پردیش کانگریس کے صدر جیتو پٹواری کو بھیجے گئے اپنے استعفیٰ میں انہوں نے پارٹی چھوڑنے کی وجہ ذاتی وجوہات بتائی تھی۔ قابل ذکر ہے کہ یوریا بحران کے درمیان 10 نومبر 2022 کو آلوٹ کے کیش سیلز سینٹر (سرکاری گودام) میں سرور کی خرابی کی وجہ سے پی او ایس مشین بند ہو گئی تھی۔ جس کی وجہ سے کسان پریشان ہو رہے تھے۔ اس کے بعد منوج چاولہ اور سابق ضلع کانگریس صدر یوگیندر سنگھ جادون سمیت کچھ لیڈر گودام پہنچے۔ وہاں ایم ایل اے نے شٹر اٹھا کر کسانوں سے کھاد نکالنے کو کہا۔ بہت سے کسانوں نے اس کا فائدہ اٹھایا۔ رجسٹر میں کوئی اندراج کیے بغیر کھاد لے گئے۔ اس معاملے میں منوج چاولہ اور کانگریس لیڈر جادون کے خلاف لوٹ، ڈکیتی اور سرکاری کام میں رکاوٹ سمیت دیگر معاملات میں مقدمہ درج کیا گیا تھا۔
