بھوپال، 21 مارچ: اپنی سادگی سے سب کا دل جیتنے والے سابق وزیر اعلیٰ شیوراج سنگھ چوہان آج بھوپال سے ٹرین کے ذریعے لاڈلی بہنوں سے ملنے گنج باسودا پہنچے۔ کارکنوں کو ان کے ٹرین سے سفر کا علم ہوا تھا انہوں نے مختلف مقامات پر ریلوے اسٹیشنوں پر ان کا پرتپاک استقبال کیا۔ ودیشا ریلوے اسٹیشن پر علاقائی ایم ایل اے مکیش ٹنڈن سمیت بڑی تعداد میں بی جے پی کارکنوں نے ان کا استقبال کیا۔ کچھ کارکن ان کے ساتھ گنج باسودا کے لیے روانہ ہوئے۔ چوہان گنج باسودا میں روڈ شو کے ساتھ روشن خیال لوگوں کی میٹنگ میں شرکت کریں گے اور پھر لاڈلی بہنوں سے بات چیت بھی کریں گے۔سابق وزیر اعلیٰ چوہان نے گنج باسودا میں میڈیا سے بات کرتے ہوئے کہا کہ میں پاوں والا بھی ہوں اور سائیکل والا بھی۔ دراصل بی جے پی نے شیوراج سنگھ چوہان کو ودیشا-رائسین لوک سبھا سیٹ سے اپنا امیدوار بنایا ہے۔ وہ اس سیٹ سے چھٹی بار لوک سبھا الیکشن لڑیں گے۔ اس بار ان کی انتخابی مہم کا انداز بالکل مختلف نظر آرہا ہے۔ وہ مختلف اسمبلی حلقوں کا دورہ کر رہے ہیں اور عام لوگوں سے ملاقاتیں کر رہے ہیں۔اپنے ٹرین کے سفر کا ذکر کرتے ہوئے سابق وزیر اعلیٰ شیوراج نے سوشل میڈیا پلیٹ فارم ایکس پر لکھا کہ بھوپال سے گنج باسودا تک ٹرین سے سفر کے دوران بہت سی یادیں تازہ ہو رہی ہیں۔ سفر کا یہ تجربہ خوشگوار ہے۔آج بلاس پور ایکسپریس لوگوں کی محبت اور اعتماد کی ایک سپر فاسٹ ٹرین بن چکی ہے۔ ودیشا کے لوگو! دل کی گہرائیوں سے آپ کا شکریہ۔ آپ کے آشیرواد اور محبتوں کے سامنے جھولی چھوٹی پڑ گئی ہے۔ اس محبت کا قرض کیسے اتاروں گا، زندگی کا ہر لمحہ آپ کی خدمت میں گزارنے کی کوشش کروں گا۔ اس سفر میں ان کی اہلیہ سادھنا سنگھ چوہان بھی ان کے ساتھ موجود تھیں۔
