بھوپال:14؍اکتوبر:مدھیہ پردیش میں سائبر جرائم کے خلاف فوری اور مؤثر کارروائی کے لیے چلائے جا رہے ’’ای-زیرو ایف آئی آر‘‘ نظام کے تحت دیواس پولیس نے ایک اہم کامیابی حاصل کی ہے۔ بینک افسر بن کر پنشن کارڈ اپ ڈیٹ کرانے اور ٹیکس میں چھوٹ دلانے کا جھانسہ دے کر ریٹائرڈ ملازم سے 6 لاکھ 3 ہزار روپے کی سائبر دھوکہ دہی کرنے والے ملزم کو دیواس پولیس نے 1500 کلومیٹر دور بہار کے ضلع کٹیہار سے گرفتار کیا ہے۔ ملزم کی نشاندہی پر دھوکہ دہی کی رقم میں سے 5 لاکھ روپے نقد ضبط کیے گئے ہیں۔تھانہ کوتوالی، دیواس کے علاقے میں رہنے والے 62 سالہ ریٹائرڈ ملازم سے سائبر دھوکہ بازوں نے بینک افسر بن کر رابطہ کیا۔ دھوکہ بازوں نے پنشن کارڈ اپ ڈیٹ کرانے اور ٹیکس میں چھوٹ دلانے کا جھانسہ دے کر ان سے مختلف ذرائع کے ذریعے مجموعی طور پر 6 لاکھ 3 ہزار روپے اپنے کھاتے میں منتقل کروا لیے۔ شکایت موصول ہونے پر تھانہ کوتوالی میں مقدمہ درج کرکے تفتیش شروع کی گئی۔
مقدمے کی سنگینی کو دیکھتے ہوئے پولیس سپرنٹنڈنٹ مسٹر پونیت گیہلوڈ کی ہدایت پر ایک خصوصی پولیس ٹیم تشکیل دی گئی۔ ٹیم نے سائبر دھوکہ دہی سے متعلق بینکنگ لین دین، موبائل نمبروں اور دیگر تکنیکی شواہد کا باریک بینی سے تجزیہ کیا۔ تکنیکی شواہد سے حاصل ہونے والی معلومات کی بنیاد پر پولیس ٹیم بہار کے ضلع کٹیہار پہنچی اور ملزم کا سراغ لگاتے ہوئے اسے گرفتار کرلیا۔ ملزم کی نشاندہی پر اس کے گھر کی الماری سے سائبر دھوکہ دہی کی رقم میں سے 5 لاکھ روپے نقد باقاعدہ طور پر ضبط کیے گئے۔گرفتار ملزم سے پوچھ گچھ اور تفتیش کے دوران حاصل ہونے والے تکنیکی و دیگر شواہد کی بنیاد پر یہ معلومات سامنے آئی ہیں کہ سائبر دھوکہ دہی کے گروہ کے مرکزی ملزمان کا تعلق جھارکھنڈ کے جامتاڑا سے ہے۔ پولیس کی جانب سے گروہ کے دیگر ارکان، ان کے بینک کھاتوں، ڈیجیٹل لین دین اور دھوکہ دہی کی باقی رقم کے بارے میں تفصیلی تفتیش کی جا رہی ہے۔قابلِ ذکر ہے کہ ضلع میں سائبر جرائم پر مؤثر قابو پانے اور متاثرین کی رقم واپس دلانے کے مقصد سے چلائے جا رہے ’’آپریشن سائبر‘‘ کے تحت ضلعی سائبر سیل مسلسل کارروائیاں کر رہا ہے۔
اسی سلسلے میں ای-زیرو ایف آئی آر کے تحت اب تک مجموعی طور پر 130 مقدمات درج کیے گئے ہیں، جن میں 26 ملزمان کو گرفتار کیا جا چکا ہے، جبکہ ملزمان سے تقریباً 98 لاکھ 52 ہزار روپے کی رقم ضبط کی گئی ہے۔مدھیہ پردیش پولیس کی جانب سے سائبر جرائم میں فوری کارروائی، تکنیکی شواہد کے مؤثر استعمال، بین الریاستی سائبر نیٹ ورک کی شناخت اور متاثرین کی رقم محفوظ کرانے کے لیے مسلسل مربوط کارروائیاں کی جا رہی ہیں۔
