بھوپال:17؍جولائی:وزیراعظم مسٹر نریندر مودی کے ذریعہ ہریانہ کے جیند میں منعقد امرت بھارت اسٹیشن اسکیم کے تحت از سر نو تیار کیے گئے ریلوے اسٹیشنوں کے ورچوئل افتتاح کے موقع پر سانچی میں منعقد مقامی پروگرام میں گورنر مسٹر منگوبھائی پٹیل بطور مہمان خصوصی جمعرات کو شامل ہوئے۔
گورنر مسٹر پٹیل نے کہا کہ امرت بھارت اسٹیشن اسکیم ہندوستانی ریلوے کے بنیادی ڈھانچے کو جدید بنانے کی سمت میں ایک اہم پہل ہے۔ امرت بھارت اسٹیشن اسکیم صرف بنیادی ڈھانچے کی تعمیر تک محدود نہیں ہے۔ یہ ریلوے اسٹیشنوں کو ثقافتی طور پر خوشحال، تکنیکی طور پر ترقی یافتہ اور مستقبل کی ضروریات کے مطابق تیار کرنے کی ایک دور اندیش کوشش ہے۔ اسکیم کے تحت ریلوے اسٹیشنوں کو جدید، صاف ستھرا، مسافروں کے لیے سہولت بخش اور ثقافتی شناخت کے ساتھ تیار کیا جا رہا ہے۔ انہوں نے کہا کہ از سر نو تیار کیے گئے اسٹیشنوں پر جدید ٹیکنالوجی، بہتر آمد و رفت کا انتظام، آسان رسائی، صاف – صفائی اور مسافروں کی سہولیات کا خصوصی خیال رکھا گیا ہے۔
گورنر مسٹر پٹیل نے کہا کہ سانچی ریلوے اسٹیشن کی از سر نو تعمیر میں پوری دنیا میں مشہور بودھ اسٹوپ سمیت علاقے کے تاریخی، ثقافتی اور تعمیری ورثے کو خوبصورتی کے ساتھ پیش کیا جانا قابل تعریف ہے۔ انہوں نے کہا کہ امرت بھارت اسٹیشن اسکیم کے تحت سانچی ریلوے اسٹیشن کو آئندہ 40 سے 50 سالوں کی ضروریات کو مدنظر رکھتے ہوئے تیار کیا گیا ہے۔ اسٹیشن پر وسیع ویٹنگ ہال، ترقی یافتہ سرکولیٹنگ ایریا، جدید ٹرین معلومات اور کوچ گائیڈنس نظام، معذور افراد کے لیے موزوں سہولیات اور چوڑے فٹ اوور برج جیسی سہولیات فراہم کی گئی ہیں۔
گورنر مسٹر پٹیل نے کہا کہ ایسے جدید اسٹیشن ترقی یافتہ ہندوستان کے اعتماد، ترقی اور نئی امکانات کی علامت بن رہے ہیں۔ پروگرام میں گورنر مسٹر پٹیل نے سانچی ریلوے اسٹیشن کی افتتاحی تختی کی نقاب کشائی کی اور ثقافتی پروگرام پیش کرنے والے طلباء کو سرٹیفکیٹ اور ٹرافی دے کر ان کی حوصلہ افزائی کی۔مرکزی وزیر مملکت (آزادانہ چارج) خواتین و اطفال ترقیات شریمتی ساوتری ٹھاکر نے کہا کہ سانچی عالمی ورثے کے لیے مشہور ہے۔ امرت بھارت اسٹیشن اسکیم کے تحت از سر نو تیار ہونے سے سانچی میں ٹرینوں کی آمد و رفت اور سیاحت کو فروغ ملے گا۔
علاقائی رکن اسمبلی ڈاکٹر پربھورام چودھری نے کہا کہ سانچی ریلوے اسٹیشن شہر کے باشندوں کے لیے فخر کا موضوع ہے۔ انہوں نے کہا کہ سانچی ریلوے اسٹیشن علاقے کی مجموعی ترقی اور سیاحت میں اہم کردار ادا کرے گا۔ یہ مقامی معیشت کو نئی رفتار دینے میں مؤثر کردار ادا کرے گا۔
پروگرام میں رکن اسمبلی مسٹر سریندر پٹوا، ضلع پنچایت صدر مسٹر یشونت مینا، کلکٹر مسٹر ارون کمار وشوکرما، پولیس سپرنٹنڈنٹ مسٹر آشوتوش گپتا سمیت دیگر عوامی نمائندے اور افسران و ملازمین بھی موجود تھے۔
