بھوپال 25جون:وزیر اعلیٰ ڈاکٹر موہن یادو نے کہا ہے کہ گھر میں بزرگوں کی دعاؤں کا ہونا تپتی دھوپ میں ٹھنڈی چھاؤں کے مترادف ہوتا ہے۔ ہماری ثقافت میں بزرگوں، بے سہارا افراد اور سماج کے سب سے کمزور طبقے کو عزت دینا صرف ایک فرض نہیں بلکہ ہمارا مذہبی فریضہ سمجھا جاتا ہے۔ ریاستی حکومت صوبے کے ہر شہری کے احترام کے لیے پْرعزم ہے۔ ہماری کوشش ہے کہ ریاست کا کوئی بھی غریب خاندان، مائیں، بہنیں یا ہمارے معذور ساتھی خود کو بے سہارا محسوس نہ کریں۔ وزیر اعظم مسٹر نریندر مودی کی قیادت میں ملک میں انتودیہ کا عزم پورا ہو رہا ہے۔ اسی سمت میں ریاستی حکومت بھی غریبوں، محروموں اور کمزور طبقات کی فلاح و بہبود کے لیے سرگرم عمل ہے۔ وزیر اعلیٰ ڈاکٹر یادو نے سنگل کلک کے ذریعے سماجی تحفظ پنشن کی تقسیم کے لیے وزارت میں منعقد پروگرام میں یہ خیالات ظاہر کیے۔ پروگرام کے ساتھ مختلف اضلاع کے مستفیدین ورچوئل طور پر منسلک رہے۔
وزیر اعلیٰ ڈاکٹر یادو نے 33 لاکھ 92 ہزار 695 سے زائد بھائیوں، بہنوں اور بزرگوں کے کھاتوں میں ماہِ مئی کی 203 کروڑ 56 لاکھ روپے کی سماجی تحفظ پنشن رقم سنگل کلک کے ذریعے منتقل کی۔ اس موقع پر سماجی انصاف و معذور افراد بااختیار سازی کے وزیر مسٹر نارائن سنگھ کشواہا، چیف سیکریٹری مسٹر انوراگ جین، ایڈیشنل چیف سیکریٹری مسٹر نیرج منڈلوئی، مسٹر سنجے شکلا، مسٹر منیش رستوگی اور پرنسپل سیکریٹری مسز سونالی واینگنکر پروگرام میں موجود تھیں۔
وزیر اعلیٰ ڈاکٹر یادو نے کہا کہ سماجی تحفظ پنشن صرف مالی امداد نہیں بلکہ غریب خاندانوں اور معذور ساتھیوں کے لیے حکومت کی جانب سے محبت، احترام اور تحفظ کا وعدہ ہے۔ ریاستی حکومت سب کو اپنے خاندان کا حصہ سمجھتی ہے۔ حکومت ہر شہری کے وقار اور احترام کے لیے پْرعزم ہے۔ وزیر اعلیٰ ڈاکٹر یادو نے کہا کہ کسان فلاحی سال میں ریاستی حکومت نے کسان دوست ایک اہم فیصلہ کیا ہے۔ ریاست کے کسانوں کو صفر فیصد شرحِ سود پر قرض دیا جائے گا اور اسے واپس کرنے کی مدت 31 مارچ تک محدود نہیں ہوگی بلکہ کسان جس تاریخ کو قرض حاصل کریں گے، اس کے بعد اگلے 12 ماہ کے اندر قرض واپس کرنا ہوگا۔
وزیر اعلیٰ ڈاکٹر یادو نے کہا کہ وزیر اعظم مسٹر مودی کی قیادت میں ملک کا ہر شہری خود کو محفوظ محسوس کر رہا ہے۔ گزشتہ 10 برسوں میں ملک کے 25 کروڑ سے زیادہ لوگ خطِ غربت سے باہر آئے ہیں۔ وزیر اعظم غریب کلیان اَنّ یوجنا کے ذریعے 80 کروڑ سے زیادہ افراد کو ہر ماہ مفت راشن فراہم کیا جا رہا ہے۔ وزیر اعظم آواس یوجنا، آیوشمان بھارت، جل جیون مشن اور اْجولا یوجنا جیسی اسکیموں نے عوامی فلاح و بہبود کی نئی تاریخ رقم کی ہے۔ ریاستی حکومت بیشتر فلاحی اسکیموں کے نفاذ میں ملک میں صفِ اول میں شامل ہے۔ حکومت غریبوں، نوجوانوں، خواتین اور کسانوں کی فلاح کے لیے مکمل عزم کے ساتھ کام کر رہی ہے۔ سماجی تحفظ پنشن رقم تقسیم پروگرام میں ریاست کے مختلف اضلاع سے بزرگ شہری، مائیں، بہنیں اور مستفیدین ورچوئل طور پر شریک ہوئے۔
