بھوپال 22جون: وزیر اعلیٰ ڈاکٹر موہن یادو نے کہا ہے کہ یومِ آزادی (15 اگست) کے موقع پر ضلعی ہیڈکوارٹرز میں منعقد ہونے والے پروگراموں میں اضلاع کے انچارج وزراء ، اضلاع میں انجام دیے گئے ترقیاتی کاموں اور فلاحی منصوبوں کی کامیابیوں سے متعلق تفصیلی معلومات پیش کریں گے۔ تقریب کے مقام پر ترقیاتی کاموں اور منصوبوں کو عوام کے سامنے رکھنے کے لیے نمائشیں بھی لگائی جائیں گی۔ یہ پریزنٹیشن ایک طرح سے ترقیاتی کاموں کے سماجی آڈٹ جیسی ہوگی۔ وزیر اعلیٰ ڈاکٹر یادو نے کہا کہ ضلعی ترقیاتی کمیٹیوں کی کانفرنس دارالحکومت بھوپال میں منعقد کی جائے گی۔ ضلعی ترقیاتی کمیٹیاں ترقیاتی سرگرمیوں کے لیے سرکاری منصوبہ بندی میں فعال شمولیت کو یقینی بنائیں۔ نجی سرمایہ کاری کو فروغ دینے کے لیے بھی ضلعی ترقیاتی کمیٹیاں کوشش کریں۔ وزیر اعلیٰ ڈاکٹر یادو نے کہا کہ اسمبلی حلقہ ترقیاتی منصوبہ کے تحت عوامی مقامات پر سی سی ٹی وی کیمرے نصب کرانے اور کم لاگت رہائشی مکانات کی تعمیر میں ماحول دوست تعمیراتی مواد کے استعمال کو فروغ دینے کی ضرورت ہے۔ انہوں نے ریاست کے تمام محکمات، ڈویژن وار اور ضلع وار شماریاتی اعداد و شمار کو ایک ہی پلیٹ فارم پر دستیاب کرانے کی ہدایت دی۔ وزیر اعلیٰ ڈاکٹر یادو پیر کے روز وزارت میں محکمہ منصوبہ بندی، اقتصادیات اور شماریات کا جائزہ لے رہے تھے۔ اجلاس میں نائب وزیر اعلیٰ مسٹر جگدیش دیوڑا، چیف سیکریٹری مسٹر انوراگ جین، ایڈیشنل چیف سیکریٹری مسٹر نیرج منڈلوئی، مسٹر منیش رستوگی اور دیگر افسران موجود تھے۔
وزیر اعلیٰ ڈاکٹر یادو نے کہا کہ مدھیہ پردیش اسمبلی حلقہ ترقیاتی منصوبہ کے تحت اسمبلی حلقوں میں تمام محکموں کی سرگرمیوں پر خصوصی توجہ دی جائے۔ منصوبہ کے تحت مکمل کیے گئے کاموں کی دیکھ بھال کا نظام بھی یقینی بنایا جائے۔ وزیر اعلیٰ ڈاکٹر یادو نے کہا کہ منصوبہ میں بہترین کام اور اختراعات انجام دینے والوں کی حوصلہ افزائی کی جائے۔
وزیر اعلیٰ ڈاکٹر یادو نے مدھیہ پردیش میں پیدائش اور اموات کے اندراج کے نظام کا جائزہ لیتے ہوئے ہدایت دی کہ موت کے اندراج کے لیے شمشان گھاٹ پر ہی رجسٹریشن کا عمل شروع کرنے کی منصوبہ بندی کی جائے۔ اس سے خصوصاً دیہی اور قصبائی علاقوں کے لوگوں کو موت کا سرٹیفکیٹ حاصل کرنے میں آسانی ہوگی۔
اضلاع کے ترقیاتی اشاریے مقامی حالات کی بنیاد پر ہوں
وزیر اعلیٰ ڈاکٹر یادو نے کہا کہ اضلاع کے ترقیاتی اشاریے مقامی حالات اور ضروریات کو مدنظر رکھتے ہوئے الگ الگ مقرر کیے جائیں۔ صنعتی پس منظر، زرعی بنیاد رکھنے والے نظام اور جنگلاتی وسائل سے مالا مال اضلاع کے لیے ترقی کے اشاریے مختلف ہونے چاہئیں۔ وزیر اعلیٰ ڈاکٹر یادو نے قدرتی کھیتی کو فروغ دینے، دیہی علاقوں میں اپنا گھر تعمیر کرنے والوں کو تکنیکی رہنمائی فراہم کرنے اور مناسب تعمیراتی مواد کے بارے میں بیداری پیدا کرنے کے لیے بھی ضروری انتظامات یقینی بنانے کی ہدایت دی۔
جل گنگا سنوردھن مہم میں پرسفوٹن اور نواکْنر کمیٹیوں کی فعال شرکت رہی
وزیر اعلیٰ ڈاکٹر یادو کی صدارت میں منعقدہ اجلاس میں بتایا گیا کہ وزیر اعلیٰ کمیونٹی لیڈرشپ کیپیسٹی ڈیولپمنٹ پروگرام کے تحت اب تک ایک لاکھ 37 ہزار سے زائد طلبہ مستفید ہو چکے ہیں۔ جل گنگا سنوردھن مہم میں پرسفوٹن اور نواکْنر کمیٹیوں نے کنوؤں، باولیوں، تالابوں، دریا کے گھاٹوں کی صفائی، آبی مذاکروں اور باولی اْتسو جیسے پروگراموں میں فعال شرکت کی۔ اجلاس میں بتایا گیا کہ آزاد، خانہ بدوش اور نیم خانہ بدوش خاندانوں کی شناخت اور رجسٹریشن کے لیے جاری مہم کے تحت اب تک 25 ہزار سے زائد خاندانوں کی معلومات پورٹل پر درج کی جا چکی ہیں۔ ریاست میں مشن کرم یوگی کے تحت افسران اور ملازمین کی تربیت کا عمل بھی جاری ہے۔
