رائے پور21جون: لوک سبھا میں قائد حزب اختلاف کانگریس کے سینئر لیڈر راہل گاندھی نے اتوار کو چھتیس گڑھ کے ابھان پور میں کانگریس کے 10 روزہ تربیتی کیمپ میں شرکت کی، جہاں انہوں نے پارٹی کے سینئر رہنماؤں کے ساتھ تبادلہ خیال کیا اور ضلع و شہر کانگریس کمیٹیوں کے صدور سے ملاقات کی۔ اس دوران ریاست بھر سے بڑی تعداد میں کارکن بھی وہاں پہنچے، جس سے پروگرام کے مقام پر خاصی گہما گہمی دیکھی گئی۔ تربیتی پروگرام کے بعد رائے پور کے راستے میں راہل گاندھی ایک سڑک کنارے قائم چائے کے اسٹال پر مختصر چائے کا وقفہ لیا۔ اس موقع پر چھتیس گڑھ کانگریس کے صدر دیپک بیج، سابق وزیر اعلیٰ بھوپیش بگھیل، سچن پائلٹ، ٹی ایس سنگھ دیو اور چرن داس مہنت سمیت کئی سینئر رہنما بھی ان کے ساتھ موجود تھے۔ چائے اور بسکٹ کے ساتھ رہنماؤں کے درمیان غیر رسمی گفتگو کا سلسلہ بھی جاری رہا۔ راہل گاندھی کی موجودگی کی اطلاع ملتے ہی وہاں موجود کارکنوں اور مقامی لوگوں میں جوش و خروش دیکھنے میں آیا۔ کئی افراد ان کے ساتھ سیلفیاں لینے اور تصاویر بنوانے کے لیے آگے بڑھتے رہے، جبکہ نوجوانوں اور دکان کے عملے نے بھی ان کے ساتھ یادگار لمحات محفوظ کیے۔
ماحول کسی رسمی سیاسی پروگرام کے بجائے ایک عوامی ملاقات کا منظر پیش کر رہا تھا۔
جاری تصویروں میں راہل گاندھی کو بچوں کے ساتھ بے تکلف انداز میں گفتگو کرتے، ایک بچے سے مصافحہ کرتے اور ایک چھوٹی بچی سے محبت بھرے انداز میں ملتے ہوئے دیکھا جا سکتا ہے۔ بعض تصاویر میں وہ مقامی افراد اور دکان کے ملازمین کے ساتھ تصاویر بنواتے نظر آ رہے ہیں، جبکہ کچھ تصاویر میں وہ ساتھی رہنماؤں کے ساتھ چائے کی چسکیاں لیتے اور ہلکے پھلکے ماحول میں بات چیت کرتے دکھائی دے رہے ہیں۔
