بھوپال:21؍جون:بین الاقوامی یومِ یوگا 2026 کے موقع پر مدھیہ پردیش ٹورزم بورڈ کی جانب سے کشابھاؤ ٹھاکرے بین الاقوامی کنونشن سینٹر، بھوپال میں ریاستی سطح کے یوگا پروگرام کا انعقاد کیا گیا۔ اس موقع پر مغربی بنگال کے شہر کولکاتا میں منعقدہ قومی پروگرام سے وزیرِ اعظم مسٹر نریندر مودی کی ورچوئل شرکت کے ذریعے ان کی حوصلہ افزا رہنمائی بھی حاصل کی گئی۔ اپنے خطاب میں وزیرِ اعظم مسٹر مودی نے یوگا کو عالمی امن اور بہتر مستقبل کے لیے ضروری قرار دیتے ہوئے کہا کہ یوگا سب کو جوڑتا ہے، سب کو ساتھ لاتا ہے، اور جب یوگا ہماری فطرت کا حصہ بن جاتا ہے تو وہ انسانی یکجہتی کی بنیاد بن جاتا ہے۔ انہوں نے کہا کہ یوگا ذہنی اور جسمانی صحت کے درمیان توازن قائم کرنے کا ایک مؤثر ذریعہ ہے۔
پروگرام میں مدھیہ پردیش ٹورازم بورڈ کے منیجنگ ڈائریکٹر اور سیاحت کے سیکریٹری ڈاکٹر الیاراجا ٹی، ایڈیشنل منیجنگ ڈائریکٹر ڈاکٹر ابھیئے بیڈیکر اور سنت ہردرام میڈیکل کالج کے ڈاکٹر انکیش بھدوریا سمیت تمام افسران اور ملازمین نے یوگا کی مشق کی۔
یوگا اپنائیں، صحت مند اور متوازن زندگی پائیں:
سیاحت کے سیکریٹری اور مدھیہ پردیش ٹورازم بورڈ کے منیجنگ ڈائریکٹر ڈاکٹر الیاراجا ٹی نے بین الاقوامی یومِ یوگا کی مبارکباد دیتے ہوئے کہا کہ یوگا صرف صحت سے متعلق ایک سرگرمی نہیں بلکہ ہماری روحانی، ثقافتی اور اخلاقی اقدار سے جڑی ہوئی ایک عظیم وراثت کا لازمی حصہ ہے۔ یوگا ہمیں نظم و ضبط، خود اعتمادی اور بہترین انداز میں زندگی گزارنے کا ہنر سکھاتا ہے۔
یوگا صحت مند زندگی کی بنیاد ہے، اسے روزمرہ زندگی کا حصہ بنائیں:
مدھیہ پردیش ٹورازم بورڈ کے ایڈیشنل منیجنگ ڈائریکٹر ڈاکٹر ابھیئے بیڈیکر نے کہا کہ یوگا کو اپنی روزانہ کی زندگی کا لازمی حصہ بنا کر ہم ایک صحت مند، خوشحال اور ترقی یافتہ معاشرے کی تعمیر میں اہم کردار ادا کر سکتے ہیں۔
ٹورزم بورڈ کے افسران کے ساتھ سیوا سمیتی بزرگ آشرم کے معمر افراد نے بھی جوش و خروش کے ساتھ یوگا کی مشق کی۔ 12ویں بین الاقوامی یومِ یوگا کی ’’یوگا فار ہیلتھی ایجنگ‘‘ تھیم پر منعقدہ اجتماعی یوگا سیشن میں سنت ہردرام آیورویدک اور قدرتی علاج کے ادارے کی تربیت یافتہ ٹیم نے مدھیہ پردیش ٹورازم بورڈ کے افسران اور ملازمین کو یوگا کی مشق کرائی۔ حکومتِ ہند کی وزارتِ آیوش کی جانب سے مقرر کردہ یوگا پروٹوکول کے مطابق یوگا سیشن میں ابتدائی دعا، ہلکی ورزشیں، آسن، پرانایام، مراقبہ اور اختتامی دعا کی مشق کرائی گئی۔ اس موقع پر تمام شرکاء نے بھرپور جوش و خروش کے ساتھ یوگا کیا اور صحت مند و متوازن طرزِ زندگی اپنانے کا عہد کیا۔
ریاست کے اہم سیاحتی مقامات پر یوگا کا پیغام گونجا:
ریاست کے مختلف سیاحتی مقامات پر ٹورازم بورڈ اور مقامی انتظامیہ نے عوامی شرکت کے ذریعے اجتماعی یوگا کیا اور یوگا کو روزمرہ زندگی کا حصہ بنانے کا عزم کیا۔ بین الاقوامی یومِ یوگا کے موقع پر مدھیہ پردیش ٹورازم بورڈ کے افسران نے کشابھاؤ ٹھاکرے بین الاقوامی کنونشن سینٹر میں اور ٹورازم ڈیولپمنٹ کارپوریشن کے افسران نے بوٹ کلب میں یوگا کی مشق کی۔ اسی طرح کھجوراہو، سانچی، ادے گیری، گوالیار قلعہ، اندور کی 56 دکان، تامیا اور دیگر سیاحتی مقامات پر ’’یوگا فار ہیلتھی ایجنگ‘‘ کے موضوع پر منعقدہ اس پروگرام میں طالبات کو یوگا کے ذریعے جسمانی اور ذہنی صحت کی اہمیت سے آگاہ کیا گیا۔
اقوامِ متحدہ نے سال 2014 میں 21 جون کو بین الاقوامی یومِ یوگا قرار دیا تھا:
وزیرِ اعظم مسٹر نریندر مودی کی پہل پر اقوامِ متحدہ نے 11 دسمبر 2014 کو ایک قرارداد منظور کرتے ہوئے ہر سال 21 جون کو بین الاقوامی یومِ یوگا کے طور پر منانے کا اعلان کیا تھا۔
اس کے بعد 21 جون 2015 کو دنیا بھر میں پہلا باضابطہ بین الاقوامی یومِ یوگا منایا گیا۔ آج پوری دنیا بھارتی فلسفہ یوگا کی اس عظیم وراثت سے مستفید ہو رہی ہے۔
