ایپوہ (ملائیشیا)، 29 نومبر (یو این آئی) – ایک ہائی اسکورنگ مقابلے میں ہندوستانی سینئر مردوں کی ہاکی ٹیم نے ہفتہ کو کینیڈا کو 14-3 سے شکست دے کر پول میں سرفہرست رہتے ہوئے سلطان اذلان شاہ کپ کے فائنل میں جگہ بنا لی۔میچ کا آغاز چوتھے منٹ میں نیل کانت شرما کے گول سے ہوا جس نے ہندوستان کو برتری دلا دی۔ اس کے بعد اپنے آغاز کے بعد عمدہ فارم میں چل رہے راجندر سنگھ نے 10ویں منٹ میں گول کیا۔ اگلے ہی لمحے کینیڈا کے برینڈن گورلیئک نے گول داغ کر جواب دیا۔ اگلے چند منٹوں میں جگراج سنگھ اور امت روہِداس نے بالترتیب 12ویں اور 15ویں منٹ میں دو مزید گول اسکور کیے۔
یہ 4-1 کی برتری ہندوستان کو دوسرے کوارٹر میں اپنا کھیل مزید بہتر بنانے میں مددگار ثابت ہوئی۔ اس ٹورنامنٹ کے لیے ٹیم کے سینئر اسٹارز کو آرام دیا گیا تھا، اس لیے نوجوان کھلاڑیوں پر بہتر کارکردگی دکھانے کی ذمہ داری تھی اور انہوں نے اس کے مطابق کھیل پیش کیا۔ اس کوارٹر میں راجندر نے 24ویں منٹ میں، دلپریت سنگھ نے 25ویں منٹ میں اور جگراج نے 26ویں منٹ میں اپنا دوسرا گول داغا۔
7-1 کی برتری کے ساتھ آگے بڑھتی ہندوستانی ٹیم کو کوئی روک نہیں پا رہا تھا، لیکن کینیڈا نے تیسرے کوارٹر میں اپنے حملے میں کچھ تبدیلی کی، جس کے نتیجے میں 35ویں منٹ میں پینلٹی اسٹروک ملا۔ میتھیو سارمینٹو نے اسے آسانی سے گول میں تبدیل کیا اور اسکور 7-2 ہوگیا۔ اس دوران جگراج نے 39ویں منٹ میں گول کر کے اپنی ہیٹ ٹرک مکمل کی، جبکہ سیلوَم کارتھی نے 43ویں منٹ میں گول داغ کر ہندوستان کی برتری 9-2 تک پہنچا دی۔
آخری کوارٹر میں سب سے زیادہ چھ گول ہوئے۔ ابتدا 46ویں منٹ میں امیت روہِداس کے پینلٹی کارنر سے ہوئی، جس کے بعد 50ویں منٹ میں جگراج کے پینلٹی اسٹروک سے گول ہوا۔ دونوں ٹیموں کو پینلٹی کارنر ملے اور اس دوران کینیڈا نے بھی ایک اور گول کیا۔ جیوتسوروپ سدھو کے گول سے اسکور 11-3 ہوگیا۔ سنجے نے 56ویں منٹ میں پینلٹی اسٹروک سے گول کر کے اپنا نام اسکور شیٹ میں درج کرایا، جبکہ ابھیشیک نے 57ویں اور 59ویں منٹ میں دو گول داغ کر میچ کو 14-3 کی فتح کے ساتھ ختم کیا۔
