احمد آباد، 19 اپریل (یو این آئی) جوس بٹلر (ناٹ آؤٹ 97) اور شرفین رادر فورڈ (43) کے درمیان ریکارڈ 119 رنز کی شراکت کی بدولت گجرات جائنٹس (جی ٹی) نے ہفتہ کو انڈین پریمیئر لیگ (آئی پی ایل) کے 35ویں میچ میں دہلی کیپٹلس (ڈی سی) کو سات وکٹوں سے شکست دی۔اس جیت کے ساتھ ہی ہندستان سات میچوں میں پانچ جیت کے ساتھ اوسط رن ریٹ کی بنیاد پر پوائنٹس ٹیبل میں پہلی پوزیشن پر پہنچ گیا ہے جبکہ دہلی بھی اتنے ہی پوائنٹس کے ساتھ دوسرے نمبر پر ہے۔ جوس بٹلر اور رادر فورڈ کے درمیان 119 رنز کی شراکت آئی پی ایل میں جی ٹی کے لیے تیسرے وکٹ کے لیے سب سے بڑی شراکت ہے، جس نے سندر اور شبھمن گل کے درمیان 90 رنز کی شراکت کا ریکارڈ توڑ دیا۔دہلی کیپٹلز (ڈی سی) نے پہلے بیٹنگ کرتے ہوئے گجرات ٹائٹنز کے خلاف 20 اوورز میں 8 وکٹوں پر 203 رنز بنائے جس کے جواب میں گجرات نے فتح کا ہدف 19.2 اوور میں 3 وکٹوں کے نقصان پر حاصل کر لیا۔ راہل تیوتیا (ناٹ آؤٹ 11) نے لگاتار دو گیندوں پر ایک چھکا اور ایک چوکا لگا کر اپنی ٹیم کو شاندار جیت دلائی۔
نریندر مودی اسٹیڈیم میں کپتان شبھمن گل (7) کا وکٹ سستے میں گر نے کے بعد سائی سدرشن (36) کا ساتھ دینے جوس بٹلر کریز پر آئے ۔ دونوں نے تیزی سے رنز بنائے اور 60 رنز کی قیمتی شراکت داری کرکے ٹیم کی بنیاد مضبوط کی۔ سدرشن کا وکٹ آٹھویں اوور میں کلدیپ نے لیا۔ بعد میں بٹلر نے نئے بلے باز رادر فورڈ کے ساتھ مل کر رنوں کی جھڑی لگادی اور دہلی کے گیند بازوں کو انہیں روکنے میں مشکل پیش آئی۔ رادرفورڈ 19ویں اوور میں مکیش کمار کا شکار بنے۔ آخری اوور میں ٹیم کو جیت کے لیے 11 رنز درکار تھے جبکہ بٹلر کو سنچری بنانے کے لیے محض تین رنز درکار تھے۔
کپتان اکشر پٹیل نے یہ سوچ کر اپنے سب سے تجربہ کار بالر مچل اسٹارک کو گیند سونپی کہ وہ پچھلے میچ کا کارنامہ دہرائیں گے اور ٹیم کو فتح دلائیں گے لیکن اسٹارک کی پہلی گیند یارکر بننے سے محروم ہو گئی اور تیوتیا نے اسے ہوا میں مار کر باؤنڈری پر بھیج دیا اور اس کے ساتھ ہی دہلی کی جیت کی امیدوں پر پانی پھر گیا۔ سنچری سے محروم بٹلر نے اپنی میچ وننگ اننگز کے دوران 54 گیندوں پر 11 چوکے اور چار چھکے لگائے۔
اس سے قبل دہلی نے پہلے پاور پلے کا بھرپور استعمال کرکے، 12 رنز فی اوور سے زیادہ کی شرح سے رنز بناتے ہوئے تیز شروعات کی۔ تاہم مہمان ٹیم نے ابھیشیک پورل (18) اور کپتان کے ایل راہل (28) کا وکٹ گنوا دیا۔ تیز شروعات کے بعد، مڈل آرڈر اپنی ذمہ داری پر پورا اترا اور کرونا نائر (31)، کپتان اکشر پٹیل (39)، ٹرسٹن اسٹبس (31) اور آشوتوش شرما کی تیز بلے بازی نے نہ صرف گجرات کے گیند بازوں کو مایوس کیا بلکہ فیلڈرز کو بھی چلچلاتی دھوپ میں پسینہ بہایا۔دہلی کا اسکور 220 سے زیادہ ہو سکتا تھا لیکن گجرات کے گیند بازوں نے بلے بازوں کو آزادانہ طور پر کھیلنے نہیں دیا۔ اننگز کی آخری 14 گیندوں پر صرف 11 رنز بنے۔ فاسٹ بولر پرسید کرشنا نے اپنے اسپیل میں 41 رنز دے کر چار اہم وکٹیں حاصل کیں جبکہ محمد سراج، ایشانت شرما، ارشد خان اور سائی کشور نے ایک ایک وکٹ حاصل کی۔
گجرات کے کپتان شبھمن گل نے اننگز کا آخری اوور اسپنر سائی کشور سے کروایا جس میں انہوں نے آشوتوش کو باندھ کر رکھا اور انہیں زیادہ رنز بنانے نہیں دیا۔ پرسید کرشنا کے ساتھ سائی کشور نے بھی شاندار گیند بازی کی اور چار وکٹیں حاصل کیں۔ وہیں سراج نے اپنے پہلے دو اوورز میں کافی رنز دینے کے بعد اپنے دوسرے اسپیل کے دو اوورز میں صرف 14 رنز دے کر ایک وکٹ حاصل کی۔ ایشانت نے بھی اپنے تین اووروں میں صرف 19 رنز دیے۔
