بھوپال19مئی: ریاست مدھیہ پردیش کے حاجیوں کے لیے حج کا شیڈول جاری کر دیا گیا ہے۔ مدھیہ پردیش کے حاجی حج پرواز کے دوسرے مرحلے میں رکھے گئے دو سفری مقامات سے روانہ ہوں گے۔ جہاں اندور کے حاجیوں کی پرواز 4 جون سے شروع ہوگی، وہیں بھوپال کے حاجیوں کی سعودی عرب روانگی 7 جون سے شروع ہوگی۔
حج پرواز کا شیڈول جمعہ کی شام دیر گئے جاری کر دیا گیا ہے۔ اس کے مطابق، ریاست کے حاجی بھوپال اور اندور ہوائی اڈوں سے پرواز کریں گے۔ اندورامبارکیشن پوائنٹ سے 4 جون سے حج پروازیں شروع ہوں گی۔ یہ سلسلہ 20 جون تک جاری رہے گا۔ اس دوران تقریباً 2137 حاجی اندور، دیواس، اجین، رتلام، مندسور، نیمچ، دھار، بڑوانی، جھابوا، علیراج پور، کھنڈوا، برہان پور، کھرگون وغیرہ اضلاع کے روانہ ہوں گے۔ اندور سے جدہ جانے والے ان حاجیوں کی واپسی 15 جولائی سے شروع ہو کر 2 اگست تک جاری رہے گی۔ اندور امبارکیشن پوائنٹ سے جانے والے حاجی بھی جدہ ایئرپورٹ سے ہی واپس آئیں گے۔
بھوپال امبارکیشن پوائنٹ سے حج پروازوں کا عمل 7 جون سے شروع ہو کر 22 جون تک جاری رہے گا۔ اس دوران تقریباً 2251 حاجی بھوپال، رائسین، سیہور، ودیشہ، ساگر، چھتر پور،ٹیکم گڑھ، جبل پور، گوالیار، گنا، راج گڑھ، بیاورا سمیت کئی اضلاع کے لیے روانہ ہوں گے۔ بھوپال سے جدہ جانے والے ان حاجیوں کی واپسی 13 جولائی سے شروع ہو کر 2 اگست تک جاری رہے گی۔ بھوپال امبارکیشن پوائنٹ سے جانے والے حاجی مدینہ ایئرپورٹ سے ہی واپس آئیں گے۔
کچھ حاجی جنہوں نے حج کی درخواست کے وقت ممبئی کا انتخاب کیا ہے وہ ممبئی ہوائی اڈے سے اپنا سفر شروع کریں گے۔ جبکہ ریوا، بیتول وغیرہ اضلاع کے حاجیوں کو ناگپور ایرپورٹ سے سعودی عرب روانگی کی سہولت ملے گی۔
