ناگپور، 05 فروری (یو این آئی) ہندوستانی ٹیم کے کپتان روہت شرما نے کہا کہ فی الحال میری پوری توجہ انگلینڈ کے ساتھ تین میچوں کی ون ڈے سیریز اور چیمپئنز ٹرافی پر ہے۔
خراب فارم کے ساتھ جدوجہد کر رہے روہت نے جمعرات سے شروع ہونے والی ون ڈے سیریز سے پہلے اپنے مستقبل کے سوال پر کہا کہ یہاں بیٹھ کر میرے مستقبل کے منصوبوں کے بارے میں بات کرنے کا کوئی فائدہ نہیں ہے اور میں ان کا جواب نہیں دینا چاہتا۔ میرے لیے یہ تینوں میچز اور چیمپئنز ٹرافی زیادہ اہم ہیں، اس لیے میری توجہ ابھی اسی پر ہے۔ فارم کے سوال پر انہوں نے کہا کہ یہ ایک مختلف فارمیٹ ہے، مختلف وقت ہے۔ بحیثیت کرکٹر ہم جانتے ہیں کہ ہمارے اوپر اتار چڑھاؤ آئے گا۔ میں نے اپنے کیریئر میں کئی بار ایسے حالات کا سامنا کیا ہے، یہ میرے لیے کوئی نئی بات نہیں ہے۔ انہوں نے کہا کہ ہم جانتے ہیں کہ ہر دن نیا دن ہے اور ہر سیریز نئی ہے۔ میں آگے آنے والے چیلنجوں سے نمٹنے کے بارے میں سوچ رہا ہوں۔ میں سیریز کے اچھے آغاز پر توجہ مرکوز کرنا چاہتا ہوں، ماضی پر نہیں۔ جسپریت بمراہ کی فٹنس سے متعلق سوال پر ہندوستانی کپتان نے کہا کہ ہم ابھی ان کی اسکین رپورٹ کا انتظار کر رہے ہیں۔ اسکین رپورٹ آنے کے بعد ہم وضاحت کرنے کے قابل ہو جائیں گے۔ فاسٹ بولر محمد شامی نے انگلینڈ کے خلاف ہوم ٹی ٹوئنٹی سیریز میں واپسی کی۔ انہوں نے کہا کہ شامی نے ڈیڑھ سال سے کرکٹ نہیں کھیلی۔ اس لیے اتنی جلدی رائے قائم نہیں کرنی چاہیے۔ وہ گزشتہ 10-12 سالوں سے کرکٹ کھیل رہے ہیں۔ انہوں نے ٹیم کے لیے پرفارم کیا ہے۔ اگر کوئی کھلاڑی ڈومیسٹک کرکٹ میں توقعات کے مطابق پرفارم نہیں کر پاتا تو اس کا یہ مطلب نہیں کہ وہ کھلاڑی برا ہے۔ وکٹ کیپنگ کے سوال پر بھارتی کپتان نے کہا کہ راہل کافی عرصے سے ون ڈے فارمیٹ میں ہمارے لیے وکٹ کیپنگ کر رہے ہیں اور انہوں نے یہ ذمہ داری بہت اچھی طرح نبھائی ہے۔ آخری 10-15 ون ڈے میں انہوں نے وہی کیا جس کی ٹیم کو ان سے ضرورت تھی۔ رشبھ بھی پوری طرح تیار ہیں۔ ہمارے پاس ان میں سے کسی ایک کو کھلانے کا اختیار ہے۔ دونوں میں میچ جیتنے کی صلاحیت ہے لیکن اگر کسی کھلاڑی نے ماضی میں اچھی کارکردگی کا مظاہرہ کیا ہے تو اسے جاری رکھنا ضروری ہے۔ ورون چکرورتی کے سوال پر انہوں نے کہا کہ انہوں نے مختلف انداز میں گیند بازی کی ہے۔ وہ ایک مختلف قسم کا گیند باز ہے۔ تو اسی لیے ہم ایک اور آپشن بھی شامل کرنا چاہتے تھے۔ یہ سیریز ہمارے لیے ایک موقع ہو گی کہ ہم اسے آزمائیں اور دیکھیں کہ وہ کیا کر سکتا ہے۔
انہوں نے کہا کہ اگر معاملات ہمارے پلان کے مطابق ہوئے تو ہم اس پر غور کریں گے۔
