بھوپال:08 ؍نومبر:بھوپال – کولار روڈ پر واقع ہوٹل پرائیڈ میں ملک کی باوقار سفری نمائش انڈیا ٹریول مارٹ (ITM) کا جمعہ کو افتتاح کیا گیا۔ تین روزہ سیاحتی نمائش میں مدھیہ پردیش، نئی دہلی، جھارکھنڈ، ہماچل پردیش، انڈیا ٹورزم کے ٹورزم بورڈز اور ملک بھر سے پرائیویٹ اسٹیک ہولڈرز حصہ لے رہے ہیں۔ 10 نومبر تک جاری رہنے والی نمائش میں مدھیہ پردیش۔ ٹورزم بورڈ کی شمولیت سے عام لوگوں کو ریاست کے سیاحتی امکانات سے واقف کرایا جائے گا۔مدھیہ پردیش ٹورازم بورڈ نے نمائش میں اپنی مختلف سیاحتی مصنوعات کی نمائش کی، جس میں بھوپال، پچمڑھی، کنہا، بندھو گڑھ اور اورچھا جیسے مقامات کو نمایاں طور پر پیش کیا گیا۔ پچمڑھی جو کہ اپنی قدرتی خوبصورتی، پرامن ماحول اور پرکشش ہل اسٹیشن کے لیے مشہور ہے، خصوصی توجہ کا مرکز بنا رہا۔ کرسمس اور نئے سال کے دوران پچمڑھی اور دیگر پہاڑی مقامات کے بارے میں مزید پوچھ گچھ کی گئی۔ ٹور آپریٹرز کے مطابق چھٹیوں کے دوران یہاں ہوٹلوں کی بکنگ 40 سے 50 فیصد تک بڑھ جاتی ہے۔
