کانپور، 03 فروری (یو این آئی) آرین جویال (201) اور کرن شرما (208) کی ڈبل سنچریوں کی مدد سے میزبان اتر پردیش نے رنجی ٹرافی ایلیٹ گروپ میں آسام کے خلاف ہفتہ کو اپنی پہلی اننگز آٹھ وکٹ پر 548 رن پر ڈکلیئر کردی۔ گرین پارک گراؤنڈ میں دن کا کھیل ختم ہونے تک آسام نے اپنی پہلی اننگز میں بغیر کسی نقصان کے 116 رنز بنائے تھے۔ پرویز مشرف 53 رنز بنانے کے بعد کریز پر تھے اور راہل ہزاریکا 51 رنز بنانے کے بعد کریز پر موجود تھے۔ آسام پہلی اننگز میں میزبان ٹیم سے اب بھی 432 رنز پیچھے ہے۔مرادآباد سے تعلق رکھنے والے 22 سالہ وکٹ کیپر بلے باز آرین نے آج صبح کے سیشن میں 278 گیندیں کھیل کر اپنے فرسٹ کلاس کیریئر کی پہلی ڈبل سنچری مکمل کی۔
اس دوران انہوں نے 21 چوکے اور ایک چھکا لگایا۔ یوپی کے دوسرے سنچری دہلی کے رہنے والے کرن شرما نے ڈبل سنچری لگاکر اپنے ناقدین کو منہ توڑ جواب دیا جو اسے باہر کا آدمی ہونے کا طعنہ دے رہے ہیں۔کرن کے آؤٹ ہونے کے کچھ دیر بعد کپتان نتیش رانا نے اننگز کے خاتمے کا اعلان کرتے ہوئے دن کے کھیل کے آخری سیشن کا فائدہ اٹھانے کی کوشش کی لیکن آسام کی اوپننگ جوڑی نے میزبان گیند بازوں کو مایوس کیا اور ناٹ آؤٹ نصف سنچری اننگز کھیل کر اپنے ارادوں کا اظہار کیا۔
