نئی دہلی، 21 فروری ( یو این آئی ) وزیر خارجہ ایس جے شنکر نے جوہانسبرگ میں چینی وزیر خارجہ وانگ یی سے ملاقات کے بعد کہا کہ دونوں ممالک کے درمیان قومی سلامتی کے مشیر اور خارجہ سکریٹری کی سطح پر بات چیت سے دو طرفہ تعلقات میں “اہم پیش رفت” ہوئی ہے۔وزیر خارجہ نے جوہانسبرگ میں جی 20 وزرائے خارجہ کے اجلاس میں وانگ یی کی موجودگی میں اپنے ابتدائی کلمات میں کہا کہ موجودہ میٹنگ اور دیگر ملاقاتوں نے “ہمیں اپنے تعلقات کے مشکل دور میں بھی بات چیت میں مشغول ہونے کے مواقع فراہم کیے ہیں”۔ انہوں نے کہا ہمیں یہ بھی تسلیم کرنا چاہیے کہ پولرائزڈ عالمی ماحول میں ہمارے دونوں ممالک نے ایک ادارے کے طور پر جی ۔ 20 کے تحفظ کے لیے سخت محنت کی ہے۔ یہ اپنے آپ میں بین الاقوامی تعاون کی اہمیت کو ثابت کرتا ہے۔ نومبر 2024 میں جی ۔ 20 سربراہی اجلاس کے دوران ریو میں ہماری آخری میٹنگ کے بعد سے کچھ اہم پیش رفت ہوئی ہے۔ ہمارے این ایس اے اور خارجہ سکریٹری نے چین کا دورہ کیا ہے اور ہمارے تعلقات کے مختلف پہلوؤں پر تبادلہ خیال کیا گیا ہے۔ انہوں نے کہا کہ ان میں سرحدی علاقوں میں امن اور ہم آہنگی کا نظم و نسق اور ہمارے تعلقات کی دیگر جہتیں شامل ہیں۔ وزیرخارجہ نے کہا کہ وہ تبادلہ خیال سے خوش ہیں۔
