بھوپال، 11 فروری (رپورٹر) ریاستی کانگریس صدر جیتو پٹواری نے وزیر اعظم نریندر مودی کے مدھیہ پردیش کے جھابوا دورے کے موقع پر پی ایم کو ہدف تنقید بنایا اور پانچ سوالات پوچھے ہیں۔ جیتو پٹواری نے کہا کہ مدھیہ پردیش میں 22 فیصد سے زیادہ آبادی والے قبائلی طبقہ کو ڈبل انجن حکومت سے کافی توقعات وابستہ ہیں اور یہ بھی توقع ہے کہ ان کی سماعت فوری طور پر کی جائے لیکن ریاستی حکومت اور مرکزی حکومت ان کی توقعات پر پورا نہیں اتر رہی ہیں۔
جیتو پٹواری نے اتوار کو پہلا سوال کرتے ہوئے وزیر اعظم سے پوچھا کہ فاریسٹ رائٹس ایکٹ کے تحت پٹے اب تک کیوں نہیں تقسیم کئے گئے، جب کہ ریاست میں قبائلی اور دیگر روایتی جنگلاتی باشندے نسل در نسل جنگل کی زمین پر کاشت کر رہے ہیں۔ کئی سال پہلے انہیں ان کا حق دینے والاقانون – فارسٹ رائٹس ایکٹ – بھی بن گیا ہے۔ پھر بھی یہ لوگ پچھلے کئی سالوں سے اپنے جنگلات کے حقوق کے لیے لڑ رہے ہیں۔
ایسا کیوں؟ کانگریس کے ریاستی صدر نے دوسرے سوال میں پوچھا کہ ایس سی/ ایس ٹی کی خالی بیکلاگ پوسٹوں کی تعداد بڑھ کر تقریباً 1 لاکھ 50 ہزار ہو گئی ہے اور اندازوں کے مطابق تقریباً 40 ہزار آسامیاں صرف اساتذہ اہلیت امتحان کے کلاس-1، کلاس-2 اور کلاس-3 میں خالی ہیں۔ اس کے علاوہ سماجی انصاف، خواتین و اطفال محکمہ، محکمہ صحت، پنچایت اور دیہی ترقیات محکموں میں ہزاروں آسامیاں خالی پڑی ہیں، ان پر بھرتی کیوں نہیں ہو رہی؟ اس کے علاوہ جیتو پٹواری نے سرکاری ملازمین کی پروموشن، قبائلیوں کی نقل مکانی اور ریاست میں آدیواسیوں پر مظالم کے حوالے سے سوالات پوچھے اور جواب مانگے۔ جیتو پٹواری نے کہا کہ توقع ہے کہ جھابوا میں آمد پر وزیر اعظم بی جے پی حکومتوں کے تعاون کا خود تجزیہ کریں گے اور دلتوں، قبائلیوں اور محروم طبقات کے ساتھ انصاف کریں گے۔
کار کی ٹکر سے معصوم بچی کی موت
دموہ، 11 فروری: مدھیہ پردیش کے دموہ ضلع کے دیہات تھانہ علاقہ کے نرسنگھ گڑھ میں واقع سیمنٹ فیکٹری اسٹاف کالونی میں ایک تیز رفتار کار نے ایک تین سالہ معصوم بچے کو کچل دیا، جس کی وجہ سے اس کی موت ہوگئی۔ شیوانی ساہو اپنی بیٹی سیجل کے ساتھ نرسنگھ گڑھ میں سلائی کا کام سیکھنے آئی اور اسٹاف کالونی کے اندر سڑک پر بیٹی کا ہاتھ پکڑ کرچل رہی تھی۔ تبھی ایک تیز رفتار کار ڈرائیور نے آکر ان کی بیٹی کو کچل دیا۔ گاڑی ایک خاتون چلا رہی تھی۔حادثے کے بعد لڑکی کو فوری طور پر فیکٹری اسپتال لایا گیا جہاں سے اسے ضلع اسپتال لایا گیا جہاں معصوم بچی کی موت ہوگئی۔ پولیس نے گاڑی کو ضبط کر لیا ہے۔
