نئی دہلی، 21 مئی (یو این آئی) کولکاتہ نائٹ رائیڈرز کے مینٹور اور ہندوستانی ٹیم کے کوچ کے عہدے کی دوڑ میں آگے چل رہے گوتم گمبھیر نے کہا ہے کہ ٹی -20 میں ٹیم کا انتخاب بلے بازی اوسط یا گیندبازی کی رفتار کے بجائے انڈین پریمیئر لیگ (آئی پی ایل) کی کارکردگی کی بنیاد پرہونا چاہیے۔گمبھیر نے آر اشون کے یوٹیوب چینل پر کہا، ’’ہندوستان کی ٹی20 ٹیم کا انتخاب کارکردگی کی بنیاد پر کیا جانا چاہئے۔ 50 اوور کے فارمیٹ میں ٹیم کا انتخاب وجے ہزارے ٹرافی سے ہونا چاہیے اور آپ کی ٹیسٹ ٹیم فرسٹ کلاس کرکٹ پر مبنی ہونی چاہیے۔ اگر آپ 50 اوور کے فارمیٹ یا ریڈ بال کرکٹ کے لیے آئی پی ایل ٹورنامنٹ کی بنیاد پرانتخاب کرتے ہیں تو یہ نوجوان کھلاڑیوں کے لیے شارٹ کٹ ہو جائے گا اور وہ ریڈ بال کرکٹ یا 50 اوور کے فارمیٹ پر توجہ دینا چھوڑ دیں گے۔انہوں نے کہا، “ہندوستان میں ہم نے نوجوان کھلاڑیوں میں بہت زیادہ ہائپ پیدا کرنا شروع کر دیا ہے۔ اگر کوئی 150 تک بولنگ کرتا ہے تو سب پر جوش ہو جاتے ہیں۔ بات یہ ہے کہ آپ کو صورت حال کو بھی دیکھنے کی ضرورت ہے۔ ٹی20 کرکٹ میں اوسط اور رنز کا اتنا اثر نہیں پڑے گا۔ جب بلے باز کا انتخاب ہو تو یہ اسٹرائیک ریٹ ہے اور جب گیندباز کا انتخاب ہو تو یہ دیکھنا ہے کہ وہ کتنے مشکل اوور ڈال سکتا ہے۔ اگلے دو تین برسوں میں یہی بحث ہوگی۔انہوں نے کہا، ’’ہم رنز کی تعداد اور اوسط، کوئی 150 ڈال رہاہے تو اس کے بارے میں بحث کرتے رہتے ہیں۔ کئی بار جب آپ ویسٹ انڈیز یا بنگلہ دیش جاتے ہیں تو آپ کو ایسے گیندباز کی ضرورت نہیں ہے جو 150 کلومیٹر فی گھنٹہ کی رفتار سے بولنگ کرتاہے۔
