نئی دہلی 6جنوری:آل انڈیا یونائٹیڈ ڈیموکریٹک فرنٹ کے سربراہ بدرالدین اجمل نے ایودھیا میں رام مندر کی افتتاحی تقریب سے قبل مسلمانوں کو ایک اہم مشورہ دیا ہے۔ انھوں نے کہا ہے کہ مسلم 20 سے 26 جنوری کے درمیان گھر پر ہی رہیں۔ ساتھ ہی انھوں نے کہا کہ بی جے پی مسلم مخالف ہے، وہ ہمارے مذہب کی دشمن ہے۔ دراصل شہید کی گئی بابری مسجد کی جگہ عظیم الشان رام مندر کا ایک حصہ بن کر پوری طرح تیار ہے۔ وزیر اعظم نریندر مودی آئندہ 22 جنوری کو رام مندر میں ’پران پرتشٹھا‘ کرنے والے ہیں۔ یعنی شری رام کی مورتی اس دن مندر کے ’گربھ گرہ‘ میں رکھی جائے گی۔ رام مندر کی اس افتتاحی تقریب کو لے کر پورے ملک میں ہندو طبقہ پُرجوش ہے اور بڑی تعداد میں لوگ ایودھیا پہنچ رہے ہیں۔ کچھ لوگوں نے اندیشہ ظاہر کیا ہے کہ اس موقع پر ملک کا ماحول خراب کرنے کی کوشش ہو سکتی ہے۔ اسی کے پیش نظر بدرالدین اجمل نے ایک ریلی سے خطاب کرتے ہوئے کہا کہ ’’مسلمان 20 سے 26 جنوری کے درمیان گھر پر ہی رہیں اور رام للا کی پران پرتشٹھا کے دوران ٹرین کا سفر کرنے سے پرہیز کریں۔‘‘ بدرالدین اجمل کے اس بیان پر بی جے پی کے شعلہ بیان لیڈر گری راج سنگھ کا رد عمل بھی سامنے آیا ہے۔ انھوں نے کہا کہ ’’بی جے پی مسلمانوں سے نفرت نہیں کرتی۔ ہم ’سب کا ساتھ، سب کا وِکاس، سب کا وِشواس‘ کے منتر کو سامنے رکھ کر کام کرتے ہیں۔‘‘ گری راج نے مزید کہا کہ ایودھیا اراضی تنازعہ کیس میں فریق رہے اقبال انصاری کو رام مندر کی پران پرتشٹھا تقریب میں مدعو کیا گیا ہے اور وہ پرارتھنا (دعا) میں بھی حصہ لیں گے۔
