لکھنؤ:08 جنوری (یواین آئی) بی جے پی حکومت پر بدعنوانی، غریبی اور بے روزگاری کو فروغ دینے کا الزام لگاتے ہوئے سماج وادی پارٹی (ایس پی)سربراہ اکھلیش یادو نے کہا کہ ترقی یافتہ ملک کو جھوٹا سپنا دکھانے والی بی جے پی کو سمجھنا چاہئے کہ صرف نعروں سے ملک کو ترقی یافتہ نہیں بنایا جاسکتا ہے۔ یادو نے پیر کو پارٹی دفتر میں ضلع اور مہا نگرصدر کی میٹنگ سے خطاب کرتے ہوئے کہا کہ بی جے پی کی عوام دشمن پالیسیوں کی وجہ سے عوام اسے لوک سبھا انتخابات میں شکست دینے کے لیے تیار ہیں۔ بی جے پی جمہوریت اور آئین کے ساتھ کھیل رہی ہے۔ وہ ایسے ہتھکنڈے اپناتی ہے جس سے عوام کی توجہ بنیادی مسائل سے ہٹ جائے۔اس الیکشن میں جمہوریت، بڑھتی ہوئی مہنگائی، بے روزگاری، کسانوں کو نظر انداز کرنا، خواتین کے خلاف بڑھتے ہوئے جرائم، ناانصافی اور کرپشن سب سے بڑے ایشوز ہوں گے۔انہوں نے کہا کہ بی جے پی حکومت پردھانوں کے بجٹ پر مہم چلا کر عوام کو ترقی یافتہ ہندوستان کا جھوٹا خواب دکھا رہی ہے۔ انہوں نے کہا کہ صرف نعروں سے ملک ترقی نہیں کرے گا۔ مہنگائی مسلسل بڑھ رہی ہے۔ جی ایس ٹی نے مہنگائی میں مزید اضافہ کیا ہے۔ حکومت مہنگائی بڑھا کر منافع کما رہی ہے۔ زیادہ منافع کمانا اور فائدہ اٹھانا بھی کرپشن ہے۔ سابق وزیر اعلیٰ نے کہا کہ ان کی پارٹی سیکٹر اور بوتھ لیول تک تنظیم کو مضبوط کر رہی ہے۔ تمام ضلعی سربراہان بوتھ کی سطح پر کارکنوں کو نشان زد کریں گے اور انہیں ذمہ داریاں دیں گے۔ کئی اضلاع میں ووٹر لسٹوں پر اچھا کام ہوا ہے۔بوتھ کی سطح پر لیڈران اور کارکنان عہدیداروں کے ساتھ مل کر معلومات جمع کریں گے کہ کہاں ووٹ کم ہوئے اور کہاں ووٹ بڑھے اور اس پر بھی نظر رکھیں گے۔ کیونکہ بی جے پی انتخابات میں ہر طرح کے ہتھکنڈے اپنا سکتی ہے۔ وہ الیکشن کمیشن پر بھی دباؤ ڈال سکتی ہے۔
