بھوپال، 8 مارچ (رپورٹر) ریاست کے ساتھ ہی پورے ملک میں 8 مارچ کو مہاشیو راتری اور عالمی یوم خواتین ایک ساتھ منایا جا رہا ہے۔ اس حوالے سے کئی پروگرام منعقد کیے جا رہے ہیں۔ اس موقع پر سابق وزیر اعلیٰ شیوراج سنگھ چوہان نے ریاست کے عوام کو مہاشیو راتری اور عالمی یوم خواتین کی مبارکباد دی۔ سابق وزیر اعلیٰ نے کہا کہ ایل پی جی سلنڈر کی قیمتوں میں کمی کر کے وزیر اعظم نریندر مودی نے تمام بہنوں کو ایک اہم تحفہ دیا ہے۔ شیوراج نے کہا کہ وزیر اعظم نریندر مودی نے ہمیشہ ماں، بہن اور بیٹی کی فلاح و بہبود پر توجہ دی ہے۔ بیٹی بچاو، بیٹی پڑھاو جیسی کئی اسکیمیں شروع کی گئی ہیں۔ آج ایل پی جی کی قیمت میں کمی سے بہنوں کو کافی راحت ملے گی۔ انہوں نے کہا کہ میں وزیر اعظم نریندر مودی کا شکریہ ادا کرتا ہوں۔کرناٹک اسمبلی میں پاکستان زندہ باد کا نعرہ لگانے والے ملزم کی تصویر راہول گاندھی کے ساتھ سامنے آنے پر سابق وزیراعلیٰ نے کانگریس پر جم کر حملہ بولا۔ انہوں نے کہا کہ یہ پاکستان زندہ باد کہنے والے کانگریس کے ساتھ ہی کیوں ہوتے ہیں؟ یہ صرف راہل گاندھی کے ساتھ ہی کیوں؟ اور ہر بات میں پاکستان کی ہی مثال کیوں دیتے ہو؟ اب سمجھ آ گئی ہے کہ کانگریس کا ہاتھ ان لوگوں کے ساتھ ہے جو پاکستان زندہ باد کہتے ہیں۔ یہ انتہائی قابل مذمت ہے۔ انہوں نے کہا کہ یہ ذہنیت کانگریس کی ذہنیت کی بھی عکاسی کرتی ہے۔
آپ کو بتا دیں کہ خواتین کے عالمی دن کے موقع پر وزیر اعظم نریندر مودی نے سوشل میڈیا پر معلومات دیتے ہوئے کہا کہ حکومت نے ایل پی جی سلنڈر کی قیمتوں میں 100 روپے کی چھوٹ دینے کا فیصلہ کیا ہے۔ اس سے ملک بھر کے لاکھوں خاندانوں کا مالی بوجھ کم ہو جائے گا۔
