پیرس، 10 اگست (یو این آئی) ہندوستانی خاتون پہلوان ریتیکا ہڈا کو پیرس اولمپکس میں ہفتہ کو خواتین کے 76 کلوگرام ریسلنگ زمرے کے کوارٹر فائنل میں کرغزستان کی اپاری میڈیٹ کائیجی کے خلاف ڈرا کے بعد آخری پوائنٹ سے محروم ہونے کے بعد شکست کا سامنا کرنا پڑا۔ اس شکست کے باوجود اگر کائیجی فائنل میں پہنچ جاتی ہیں تو ریتیکا کے پاس ریپیچج میں کانسے کے تمغے کا میچ کھیلنے کا موقع ہوگا۔ عالمی نمبر ایک خاتون ریسلر کائیجی اور ریتیکا کا اسکور 1-1 سے برابر رہا لیکن حاصل کردہ آخری پوائنٹ کی وجہ سے ٹاپ سیڈ کائیجی کو میچ کا فاتح قرار دیا گیا۔ تاہم ریتیکا نے اپنے جذبے سے سب کا دل جیت لیا۔ ریتیکا نے کائی جی کو آخر تک سخت مقابلہ دیا۔ اس سے قبل ریتیکا نے پری کوارٹر فائنل میچ میں ہنگری کی برناڈیٹ کو 12-2 سے شکست دے کر کوارٹر فائنل میں جگہ بنائی تھی۔ ریتیکا نے دفاعی کھیل (پیریڈ) میں پہلے ہی 4-0 کی برتری حاصل کر لی تھی، لیکن انہوں نے دوسرے دور میں شاندار کارکردگی کا مظاہرہ کیا اور آٹھویں سیڈ پہلوان کو زیادہ موقع نہیں دیا۔ ریتیکا نے دفاعی کھیل کا آغاز کیا اور ہنگری کے پہلوان کے حملے کو شاندار طریقے سے روکنے میں کامیاب رہیں۔ ریتیکا، اس وزن کے زمرے میں اولمپکس کے لیے کوالیفائی کرنے والی ملک کی پہلی ریسلر ہیں، اس سے قبل تکنیکی برتری سے جیت کر کوارٹر فائنل میں جگہ بنا چکی تھیں۔اولمپک ریسلنگ کے قوانین کے مطابق اگر میچ ٹائی ہو جائے تو آخری پوائنٹ حاصل کرنے والے کھلاڑی کو فاتح قرار دیا جاتا ہے۔ کرغزستان کے کائیجی نے اس سے فائدہ اٹھایا۔ اگر کائیجی فائنل میں پہنچ جاتی ہیں تو ریتیکا کو ریپیچیج کے ذریعے کانسے کے تمغے کا میچ کھیلنے کا موقع ملے گا۔ اولمپکس 2024 میں کشتی کے قوانین نے ہندوستان کی گولڈ میڈل کی امیدوں کو ایک بڑا دھچکا پہنچایا ہے۔ ریتیکا سے پہلے ونیش پھوگاٹ بھی تمغہ جیتنے سے محروم رہی تھیں۔ ونیش کا وزن اس کے زمرے کے وزن سے صرف 100 گرام زیادہ تھا اور وہ فائنل نہیں کھیل سکیں۔ انہیں اولمپک قوانین کی بنیاد پر نااہل قرار دیا گیا تھا۔
