نئی دہلی4دسمبر:کیرالہ کے وائناڈ سے نومنتخب رکن پارلیمنٹ پرینکا گاندھی نے وزیر داخلہ امت شاہ سے ملاقات کی۔ رکن پارلیمنٹ منتخب ہونے کے بعد ان کی وزیر داخلہ سے یہ پہلی ملاقات تھی۔ انہوں نے ملاقات کے دوران اپنے پارلیمانی حلقہ وائناڈ کے لیے اسپیشل پیکج کی مانگ کی ہے۔ پرینکا گاندھی نے امت شاہ سے خصوصاً وائناڈ میں لینڈسلائڈ متاثرین کے امداد کی بات کی ہے۔ رواں سال 30 جولائی کو کیرالہ کے وائناڈ میں شدید بارش کی وجہ سے لینڈسلائڈ کا حادثہ پیش آیا تھا جس کی وجہ سے علاقے میں زبردست تباہی مچ گئی تھی۔ لینڈ سلائڈ کی وجہ سے ہزاروں لوگ متاثر ہوئے اور سینکڑوں لوگ اپنی جان گنوا بیٹھے تھے۔ وزیر داخلہ امت شاہ سے ملاقات کے بعد پرینکا گاندھی نے نامہ نگاروں سے بات کرتے ہوئے کہا کہ ’’وائناڈ لینڈ سلائڈ متاثرین کی مدد کے لیے ہم نے امت شاہ سے ملاقات کی۔ وہاں کی جو صورتحال ہے، ہم نے اس سے ان کو آگاہ کیا۔ انھیں بتایا کہ وہاں کے لوگوں کو کن پریشانیوں کا سامنا کرنا پڑ رہا ہے۔ ہم نے ان کو یہ بھی بتایا کہ حادثے کے بعد وہاں کے لوگ پوری طرح برباد ہو چکے ہیں۔ لوگوں کے پاس کوئی سپورٹ سسٹم نہیں بچا ہے۔‘‘ وزیر داخلہ سے ملاقات کے دوران ان کے ساتھ 21 دیگر اراکین پارلیمنٹ بھی موجود تھے۔ پرینکا گاندھی نے نامہ نگاروں سے بات کرتے ہوئے یہ بھی بتایا کہ ’’ہم نے وزیر داخلہ سے کہا ہے کہ سیاسی اختلافات کو الگ رکھتے ہوئے متاثرین کی مدد کے لیے مرکزی حکومت لوگوں کی حتی الامکان مدد کرنے کی کوشش کرے۔ کیوںکہ لینڈ سلائیڈ کی وجہ سے وائناڈ کو کافی نقصان ہوا ہے۔ لوگوں کے گھر، بزنس، اسکول وغیرہ سب کچھ بہہ گئے ہیں۔ ایسے میں انہیں فوری طور پر ریلیف فنڈ کی ضرورت ہے۔‘‘
