نئی دہلی، 17 مارچ (یو این آئی) شریانکا پاٹل، سوفی مولینیو اور سوبھنا آشا کی جارحانہ گیند بازی کے بعد ایلیس پیری کی ناٹ آوٹ 35 رنز اور سوفی ڈیوائن کی 32 رنز کی اننگز کی بدولت رائل چیلنجرز بنگلورو خاتون ٹیم نے وومینس پریمیئر لیگ کے فائنل مقابلے میں دہلی کیپٹلس کو آٹھ وکٹوں سے شکست دے کر خطاب اپنے نام کیا۔ 114 رنز کے ہدف کے تعاقب میں رائل چیلنجرز بنگلور نے اچھی شروعات کی اور پہلی وکٹ کے لیے 49 رنز جوڑے۔ سوفی ڈیوائن کو شیکھا پانڈے نے پہلی وکٹ کے طور پر ایل بی ڈبلیو آؤٹ کیا۔ سوفی نے 27 گیندوں میں پانچ چوکوں اور ایک چھکے کی مدد سے 32 رنز بنائے۔ کپتان اسمرتی مندھانا دوسری وکٹ کے طور پر 31 رنز بنانے کے بعد آؤٹ ہوئیں۔ ایلیز پیری نے 37 گیندوں میں چار چوکوں کی مدد سے 35 رنز کی محتاط اننگز کھیلی اور ریچا گھوش 17 رنز بنا کر ناٹ آؤٹ رہیں۔ بنگلورو نے 19.3 اوورز میں 115 رنز بنا کر آٹھ وکٹوں سے میچ جیت لیا۔دہلی کیپٹلس کے لیے شکھا پانڈے اور منو مانی نے ایک ایک بلے باز کو آؤٹ کیا۔اس سے قبل دہلی کیپٹلس نے رائل چیلنجرز بنگلور کو جیت کے لیے 114 رنز کا ہدف دیا تھا۔ دہلی کیپٹلس ویمن نے آج یہاں ارون جیٹلی اسٹیڈیم میں ٹاس جیت کر پہلے بلے بازی کا فیصلہ کیا تھا۔ دہلی کی اوپننگ جوڑی کپتان میگ لیننگ اور شیفالی ورما نے اچھی شروعات کی اور پہلے وکٹ کے لیے 64 رنز جوڑے۔ آٹھویں اوور میں سوفی مولینو نے شیفالی ورما کو ویرہم کے ہاتھوں کیچ آؤٹ کروا کر دہلی کو پہلا جھٹکا دیا۔ شیفالی نے 27 گیندوں میں دو چوکوں اور تین چھکوں کی مدد سے 44 رنز بنا کر دہلی کے لیے سب سے زیادہ رنز بنائے۔ اگلے ہی اوور میں شریانکا پاٹل نے کپتان میگ لیننگ کو 23 رنز پر ایل بی ڈبلیو بھیج دیا۔ اس کے بعد دہلی کا کوئی بھی بلے باز بنگلورو کی اسپن کا سامنا نہیں کر سکا۔ مارجن کیپ آٹھ رنز بنانے کے بعد، جیس جانسن تین رنز ، رادھا یادیو 12 رنز بنانے کے بعد، منو منی پانچ رنز اور اروندھتی ریڈی 10 رنز بنانے کے بعد آؤٹ ہوئیں۔ جمائمہ روڈریگز، ایلس کیپسی اور تانیہ بھاٹیہ کھاتہ کھولے بغیر ہی پویلین لوٹ گئیں۔ شیکھا پانڈے پانچ رنز بنا کر ناٹ آؤٹ رہیں۔ دہلی کیپٹلس کی پوری ٹیم 18.3 اوور میں 113 رنز پر ڈھیر ہو گئی۔رائل چیلنجرز بنگلور کی خواتین ٹیم کی جانب سے شریانکا پاٹل نے چار وکٹیں حاصل کیں۔ سوفی مولینو نے تین وکٹیں حاصل کیں۔ سوبھنا آشا نے دو بلے بازوں کو آؤٹ کیا۔
