سری نگر8ستمبر: جموں و کشمیر اسمبلی انتخابات کے لیے بھارتیہ جنتا پارٹی (بی جے پی) نے اپنی چھٹی امیدواروں کی فہرست جاری کر دی ہے۔ پارٹی نے اس فہرست میں کل 10 امیدواروں کے ناموں کا اعلان کیا ہے، جن میں پانچ مسلم امیدوار بھی شامل ہیں۔ یہ فیصلہ بی جے پی کے انتخابات کے لیے مخصوص حکمت عملی کے تحت کیا گیا ہے، جو مختلف طبقوں کو مائل کرنے کی کوشش کر رہی ہے۔ بی جے پی نے جموں و کشمیر کے مختلف علاقوں سے اپنے امیدواروں کا اعلان کیا ہے، ان میں سے مسلم امیدواروں میں کرناہ سے محمد ادریس کرناہ، ہندواڑا سے غلام محمد میر، سونہ واری سے عبدالرشید خان، بانڈی پورہ سے نصیر احمد لون، اور گریز سے فقیر محمد خان شامل ہیں۔ اس کے علاوہ، پارٹی نے دیگر علاقوں سے بھی امیدواروں کے ناموں کا اعلان کیا ہے، جن میں ادھم پور مشرق سے آر ایس پٹھانیا، مڑھ سے سریندر بھگت اور کٹھوعہ سے ڈاکٹر بھارت بھوشن شامل ہیں۔ بی جے پی کے مرکزی رہنما، وزیر داخلہ امیت شاہ نے حال ہی میں پارٹی کا انتخابی منشور جاری کیا تھا۔ انہوں نے وعدہ کیا ہے کہ اگر بی جے پی کی حکومت بنتی ہے تو مختلف اقدامات کیے جائیں گے۔ ان میں ‘ماں عزت سکیم کے تحت گھر کی تمام بزرگ خواتین کو 18 ہزار روپے دیے جائیں گے، اور اُجولا سکیم کے تحت خواتین کو دو مفت گیس سلنڈر فراہم کیے جائیں گے۔ مزید برآں، تعلیم میں مالی مشکلات سے بچانے کے لیے، ہر طالبہ کو سالانہ تین ہزار روپے دیے جائیں گے۔ امیت شاہ نے بزرگ خواتین کو ماہانہ تین ہزار روپے پینشن دینے کا بھی وعدہ کیا، جو کہ اس وقت ایک ہزار روپے ہے۔ کسانوں کے لیے ‘کسان عزت سکیم کے تحت، ہر سال 6 ہزار روپے کی جگہ 10 ہزار روپے دینے کا وعدہ کیا گیا ہے۔ امیت شاہ نے واضح کیا کہ آئین کی دفعہ 370 اب تاریخ کا حصہ ہے اور موجودہ حالات سے کوئی تعلق نہیں رکھتی۔
