رورکیلا، 13 فروری (یو این آئی) ہندوستانی خواتین ہاکی ٹیم 14 فروری کو ایف آئی ایچ ہاکی پرو لیگ 2023/24 میں ہالینڈ کے ساتھ اپنا چھٹا میچ کھیلے گی۔ ایف آئی ایچ ہاکی پرو لیگ 2023/24 کا سفر ہندوستانی ٹیم کے لیے اب تک بہت مشکل رہا ہے جہاں اسے اپنے پانچ میں سے چار میچوں میں شکست کا سامنا کرنا پڑا ہے۔ چین کے خلاف اپنے پہلے میچ میں 1-2 سے ہارنے کے بعد، ہندوستانی خواتین کو ہالینڈ سے 1-3 اور آسٹریلیا سے 0-3 سے شکست کا سامنا کرنا پڑا، تاہم بھونیشور میں اپنے آخری میچ میں اسے امریکہ کے خلاف 3-1 سے جیت حاصل ہوئی۔ رورکیلا لیگ کے اپنے پہلے میچ میں، ہندوستان نے کھیل کے شروع میں برتری حاصل کی، لیکن چین نے زبردست واپسی کرتے ہوئے میچ 2-1 سے جیت لیا۔ہندوستانی کپتان سویتا نے کہا کہ “ہمیں وہ نتائج نہیں ملے جو ہم چاہتے تھے، لیکن مجھے یقین ہے کہ ہمارے پاس اچھی کارکردگی دکھانے اور اپنی ٹیم کے لیے کچھ پوائنٹس حاصل کرنے کے لیے ضروری سب کچھ ہے۔ مجھے لگتا ہے کہ ہم ٹکڑوں ٹکڑوں میں اچھا کھیل رہے ہیں، لہذا اگر ہم اس میں مزید مستقل مزاجی لا سکتے ہیں، تو ہم یقینی طور پر مزید گیمز جیت سکتے ہیں۔ عالمی نمبر ایک ٹیم نیدرلینڈز کو ہندوستانی خواتین ہاکی ٹیم پر برتری حاصل ہے، نیدرلینڈز نے پورے ٹورنامنٹ میں اپنی صلاحیت کی جھلک دکھائی ہے۔ نتائج ہندوستان کے حق میں نہیں رہے ہیں لیکن وہ بدھ کو ڈچ ٹیم کے خلاف کھیلتے ہوئے اس کا رخ موڑنا اور پوائنٹس ٹیبل پر آگے بڑھنے کی کوشش کریں گے۔
ہندوستانی کوچ جینیک شوپمین نے کہا، “نیدرلینڈ ایک معیاری ٹیم ہے لیکن ہمارے پاس ٹیلنٹ یا صلاحیت کی کمی نہیں ہے۔ “ہم اپنی ہاکی کی شدت کو بلند رکھتے ہوئے صبر کا مظاہرہ کریں گے اور اسکور کرنے کے جو بھی مواقع ہمارے پاس ہیں اس سے فائدہ اٹھانے کی کوشش کریں گے۔”ہندوستانی خواتین کی ہاکی ٹیم 14 فروری کو رورکیلا کے برسا منڈا ہاکی اسٹیڈیم میں 1930 بجے ہندستانی وقت کے مطابق نیدرلینڈ سے مقابلہ کرے گی۔
