میلبورن، 24 جنوری (یو این آئی) ہندوستانی ٹینس کھلاڑی روہن بوپنا اور ان کے آسٹریلیائی پارٹنر میتھیو ایبڈن نے اپنی شاندار کارکردگی کو جاری رکھتے ہوئے بدھ کو آسٹریلین اوپن 2024 کے مردوں کے ڈبلز مقابلے کے سیمی فائنل میں رسائی حاصل کی۔بوپنا اور ایبڈن کی سیکنڈ سیڈ جوڑی نے آج یہاں کھیلے گئے کوارٹر فائنل میں میکسیمو گونزالیز-اینڈریس مولٹینی کی چھٹی سیڈ ارجنٹینا کی جوڑی کو ایک گھنٹہ 46 منٹ تک جاری رہنے والے میچ میں 6-4، 7-6 سے شکست دی۔
بوپنا اور ایبڈن نے اپنے ابتدائی سروس گیمز کو برقرار رکھا اور پانچویں گیم میں گونزالیز کی سروس توڑ کر 3-2 کی برتری حاصل کی۔ ہند-آسٹریلیائی جوڑی نے آٹھویں گیم میں بریک پوائنٹ بچا کر پہلا سیٹ جیت لیا۔بوپنا اور ایبڈن نے دوسرے سیٹ میں بھی اپنی سروس برقرار رکھی۔ مساوی مقابلے کی وجہ سے سیٹ ٹائی بریکر پر چلا گیا جسے بوپنا اور ایبڈن نے 7-5 سے جیت لیا۔روہن بوپنا اور میتھیو ایبڈن جمعرات کو سیمی فائنل میں چین کے ژانگ زیزن اور جمہوریہ چیک کے ان کے ساتھی ٹوماس مچک سے مقابلہ کریں گے۔
جھیزین اور مچک نے ایریل بیہار اور ایڈم پاولاسیک پر مشتمل یوروگوئین جوڑی کو 6-3، 6-1 سے شکست دے کر آخری چار تک رسائی حاصل کی۔
